in

Máncasme man

mancasme man |

Unha fera indómita que fende as murallas

| Afonso Becerra de Becerreá |

mancasme man

 

A noite do catro de setembro, no Clavicémbalo de Lugo, asistín a unha revelación teatral co texto Máncasme man. O home que mancaba as mulleres, escrito e actuado por Iria Acevedo. Un pequeno gran espectáculo de cabaré sobre o amor e o desamor, que consegue non caer nos tópicos temáticos nin no chiste fácil.

Iria parece facer súa a máxima aquela de Thelonious Monk que avoga pola arte libre, sen as concesións ao que se supón que a xente demanda, na súa maioría educada (estragada) polos estándares comerciais televisivos. O xenial Monk afirmaba: “Non toques o que o público quere, senón o que ti queres, e déixalle ao público aprehender o que ti fas.” Velaí que esta actriz e dramaturga luguesa é capaz de facer o que lle dá a gana e, por riba, que semelle que fai o que o auditorio desexa. Velaí, asemade, un dos selos das artistas de caste: a capacidade para levarnos ao seu terreo sen decatármonos.

Publicidade

Acompañada ao piano por Miguel Granero, Iria Acevedo cóntanos e cántanos unha historia de amor e tolería que ten un punto de xiro coa anagnórise da protagonista e a súa emancipación como persoa e como muller.

O personaxe chámase “Vicki Reformas” e a actriz cualifica o seu xénero como cabaré de furancho. O punto de xiro ou “reforma” en Máncasme man vén sinalado musicalmente e escenicamente polas melodías que Granero degraña no piano e por un xesto tan sinxelo e tan máxico como o de quitar a perruca do personaxe, para facer unha transición do paradoxal ser (muller) obxecto ao exemplar ser (muller) suxeito.

Máncasme man. O home que mancaba as mulleres enfía a épica e a lírica das relacións sexuais e afectivas, cun equilibrio e un humor moi delicados e cunha aparencia de sinxeleza dunha eficacia absoluta.

Esta Iria Acevedo é unha besta escénica: eu non sei como non está co Grupo Chévere. Non sei por que ao vela actuar pensei niso, ou si que o sei pero non o vou a explicar agora. O caso é que esta actriz encáixame coas propostas dos Chévere. Iria actúa con desenvoltura e precisión, ten unha voz poderosa e sabe cantar sen necesidade de recorrer aos estereotipos vocais do xénero do cabaré, sen por iso romper a convención. Esta actriz ten “duende” na mirada e na presenza escénica. Hai algo aí que desprega unha enerxía empática, irrefreable e única.

Por iso espero poder vela en espectáculos que xiren alén da muralla luguesa. Porque en Lugo hai murallas para o desenvolvemento do teatro profesional, verdade? Madia leva, habelas hainas! Pero tamén se albiscan feras indómitas e brillantes, como Iria Acevedo, capaces de fender murallas.

 

Máncasme man. O home que mancaba ás mulleres de Iria Acevedo
Dirección: Iria Acevedo.
Interpretación: Iria Acevedo e Miguel Granero.
Fotografía: Guillermo Cancelo.

Clavicémbalo, Lugo, 4 de setembro, 2014

Publicidade
Publicidade
Publicidade
Afonso Becerra

Afonso Becerra

Director da erregueté | Revista Galega de Teatro. Pertence ao seu Consello de Redacción desde o 2006. Doutor en Artes Escénicas pola Universitat Autònoma de Barcelona. Titulado Superior en Dirección escénica e dramaturxia polo Institut del Teatre de Barcelona. Titulado en Interpretación polo ITAE de Asturies. Dramaturgo e director de escena. Exerce a docencia en dramaturxia e escrita dramática na ESAD de Galiza desde o ano 2005. É colaborador, entre outras publicacións, de revistas de cultura e artes performativas como 'ARTEZBLAI', 'Primer Acto', 'Danza en escena', 'Tempos Novos', 'Grial'. Entre setembro de 2019 e xuño de 2021 foi colaborador especialista en artes escénicas da CRTVG, no programa 'ZIGZAG' da TVG. Desde setembro de 2022 é colaborador semanal sobre artes escénicas do 'DIARIO CULTURAL' da RADIO GALEGA.
Premio Álvaro Cunqueiro da Xunta de Galicia en 2001. Premio María Casares á Mellor Adaptación teatral en 2016. Premio de Honra do Festival de Teatro Galego, FETEGA, do Carballiño (Ourense) en 2020. Mención Honrosa no Premio Internacional de Xornalismo Carlos Porto 2019 do Festival de Almada (Portugal, 2020).

Deixa unha resposta

Avatar

O teu enderezo electrónico non se publicará Os campos obrigatorios están marcados con *

improperio |

Improperio D.F.

bye |

Bye bye honey