Galicreques, seleccionado para Iberescena 2018

O Festival Galicreques resulta seleccionado entre os proxectos que se beneficiarán das axudas para o Programa Iberescena 2017-2018

 

O Consello Intergobernamental do Programa Iberescena (CII), reunido no Concello de San Salvador (El Salvador) do 28 de novembro ao 1 de decembro de 2017, designou a concesión de axudas económicas nas distintas liñas de participación establecidas polo Programa. Na presente convocatoria, ascendeu a un total de 1.066.065 euros. Estas axudas foron distribuídas entre os catorce países que forman parte do Fondo Iberoamericano de Axuda Escénica e que fixeron a súa contribución financeira para o presente exercicio, aínda que se está a transferencia definitiva de dous dos países membros do Programa.

Outorgáronse 102 axudas do seguinte xeito: 33 á coproducción de espectáculos iberoamericanos de teatro e danza (363.600 euros); 14 aos Centros Iberoamericanos de Creación Escénica en Residencia (83.500 euros) e 55 a festivais e lugares escénicos para a programación de espectáculos (618.965 euros). Neste último capítulo encádrase a axuda que recibe Galicreques.

O Festival Galicreques –que no 2018 celebrará a súa vixésimo terceira edición– está organizado pola Asociación Cultural Barriga Verde. Trátase dun dos festivais máis lonxevos de Galicia que se converteu nunha referencia fundamental para o teatro de monicreques, contribuíndo á súa promoción e dignificación entre o público adulto e o escolar. Nos últimos anos, o festival xerou varias extensións que ampliaron o seu raio de influencia a cidades como Vigo e A Coruña.

Galicreques, que dedica un espazo destacado da súa programación aos grupos galegos de teatro de monicreques, leva desenvolvido, no ámbito internacional, un importante labor de proxección en América Latina, propiciando o intercambio e dando a coñecer múltiplas compañías daquela rexión en Galicia, ademais de contribuír a difundir o traballo de compañías de Portugal e do resto da península.

Ademais, o festival concede cada ano un premio a unha entidade, persoa ou empresa polo seu traballo no mundo dos títeres a través de proxectos que contribúen a consolidar esta arte teatral. Nos últimos anos recibiron este galardón a compañía granadina Etcétera, o TOPIC (Centro Internacional del Títere de Tolosa) ou a compañía Viravolta e o seu Museo Galego da Marioneta.

En anos anteriores, outros proxectos escénicos galegos que contaron co apoio de Iberescena foron Salvador de Borja Fernández, o Soño dunha noite de verán de Voadora ou Street Art Symphony de Fernando Epelde.

 

Foto: Marina Mahmood | Unha escena de O dia em que a morte sambou / A señora Rosa e a morte, da compañía brasileira Valeria Rey Soto & Habib Zahra, na edición de 2017.

Deixar unha resposta