Tanxarina leva o seu Titiricircus á Mostra Internacional de Artes para o Pequeno Público de Almada

Sementes 2018 – XXIII Mostra Internacional de Artes para o Pequeno Público desenvólvese no municipio portugués de Almada do 18 de maio ao 3 de xuño cun programa con máis de 60 sesións de 25 espectáculos presentados por unha vintena de compañías chegadas de Bulgaria, España, Francia, Italia, Portugal e a República Checa. Galicia estará representada da man de Tanxarina Títeres que, do 27 de maio ao 3 de xuño, ofrecerá oito sesións do seu Titiricircus en diferentes espazos do festival. Ao igual que en edicións anteriores, o Sementes espállase por todas as freguesías do Concello de Almada e polos municipios de Alcochete, Barreiro, Loures, Moita, Montemor-o-Novo, Seixal e Sesimbra.

Neste 2018 no que se conmemora o Ano Europeo do Patrimonio Cultural, o Sementes – Mostra Internacional de Artes para o Pequeno Público de Almada propón unha viaxe arredor do mundo que quere comezar no propio interior de cada individuo para rematar no “infinito e máis alá”. Ao longo de tres semanas, o Sementes  combinará teatro, marionetas, música, circo, danza, artes de rúa, performance, xogos e cinema dentro dun programa que contará con especial relevo a fin de semana do 1, 2 e 3 de xuño. Para o 1 de xuño, data na que se celebra o Dia Mundial da Criança,  xunto con diferentes iniciativas para celebrar con familia e escolas, o Sementes prepara un programa repleto de actividades nas que destacan, entre outros, a presentación de Ratsódia, un espectáculo musical de Teatro Extremo; a presentación da peza Um dia serei grande, da compañía portuguesa Baal17; o proxecto de música e artes de rúa Mimo’s Dixie Band e Out, da compañía francoitaliana de teatro aéreo Mattatoio Sospeso. Por outra parte, o 3 de xuño, o Parque da Paz de Almada será o escenario do final de festa cun programa de actividades que se desenvolverá desde a mañá até ao final do día.

Un ano máis, a Mostra Internacional de Artes para o Pequeno Público de Almada ofrece unha proposta de contacto e diálogo entre culturas e temporalidades, de occidente a oriente, do clásico ao contemporáneo. Con esta nova entrega, o festival propón “unha viaxe iniciática que co sopro, o aire e o vento, co riso, a poesía e a maxia, o coñecemento, o amor e a sabedoría, compartindo experiencias e afectos, nos axudará a crecer, tornar grandes e a transformar e a preservar a sociedade, o mundo e a natureza”.

Pódese consultar o programa de Sementes 2018 aquí.

Deixar unha resposta