Este xoves 31 de maio, na Sala Agustín Magán de Compostela, ás 18:00, a compañía Producións Teatrais Excéntricas presentará un ensaio aberto do espectáculo que está a preparar, Carpe diem, seguido dun coloquio co público.
Inspirada na sesión que a compañía xa fixo con motivo da residencia d’A Cabeza do Dragón, os seus compoñentes farán un ensaio aberto con demostración didáctica de todos os estratos do acto teatral, dende a intención previa até a execución harmónica das distintas linguaxes que conflúen no teatro: a luz, a música , o vestiario, o espazo, a marcación escénica e o uso lúdico do espazo por actrices e actores.
Todas estas linguaxes presentaranse deconstruídas e posteriormente unidas nun divertido e instrutivo puzzle. Tratase dun xogo co público, seguido dunha conversa, que lonxe de destripar o xoguete teatral, aumenta o seu interese como espello público e instrumento de reflexión.
Nesta ocasión , aparte das linguaxes xa citadas traballarán algúns casos singulares, como a versión do texto desde unha variante tan próxima á nosa lingua como é o portugués do Brasil. Outra singularidade é o uso da música en directo, sobranceando a súa función ambiental, para facer dela un factor narrativo e, finalmente , a relación do teatro co cinema e a influencia deste na nosa biografía sentimental. Non é pouco. A sesión contará coa presenza, para alén do elenco, de todas as persoas creativas que contribúen ao proxecto.
Producions Teatráis Excéntricas é una empresa que se dedica á creación de espectáculos teatrais, de productos de entretemento e outros obxectos culturais. Serve como plataforma de produción a marcas como Mofa e Befa, aos espectáculos unipersoais de Quico Cadaval e a proxectos musicais de Piti Sanz.
