Voadora estreará unha ópera de Fernando Buíde e Fernando Epelde en 2019

En novembro de 2019 estrearase en Santiago e Vigo A amnesia de Clío, unha ópera con música de Fernando Buíde e libreto de Fernando Epelde, que constituirá a primeira produción deste xénero da compañía Voadora. A dirección escénica correrá a cargo de Marta Pazos, mentres que Paul Daniels se fará cargo da dirección musical á fronte da Real Filharmonía de Galicia.

A Amnesia de Clío vai ser unha ópera en tres actos sobre unha hora e media de duración. O rol principal será Cicciolina, nome artístico de Ilona Staller, unha estrela do cine porno nos anos oitenta que chegou a desenvolver unha carreira na política italiana e que foi celebrada como musa da arte contemporánea despois de casar co artista Jeff Koons. O antagonista, por outra banda, será o ex presidente dos Estados Unidos George W. Bush. Xunto con algúns secundarios, armarán unha pequena distopía escrita en clave feminista.

Onte, Buíde e Epelde, compartiron nas Xornadas de Música Contemporánea de Compostela as claves desta ópera.

Fernando Buíde, nacido en Compostela en 1980, estudou en Santiago, Oviedo ePittsburgh, e recibiu o seu doutorado na Universidade de Yale. Foi compositor residente na Real Academia de España en Roma. Durante a temporada 2014-15 foi o compositor español actual máis programado por orquestas sinfónicas profesionales do estado español.

Fernando Epelde é un dos autores dramáticos galegos con máis proxección e adoita traballar en colaboración coa compañía Voadora. Entre as súas obras, pódense citar Caixa negra (Editado pola erregueté e obxecto dunha recente adaptación á banda deseñada por Manuel Tudela), Walkie Talkie, A guerra silenciosa, Street Art Symphonie, Drone, O mundo persistente, Calypso ou Garage, entre moitas outras. Compaxina o seu traballo como dramaturgo co desenvolvemento de varios proxectos musicais.

 

Deixar unha resposta