III Xornada de Literatura Dramática da AELG

O próximo 24 de novembro, a Asociación de Escritores en Lingua Galega (AELG) en colaboración coa Asociación Sócio-Pedagóxica Galega, co apoio do Concello da Coruña, a Deputación Provincial da Coruña, a Universidade da Coruña e CEDRO, organizan a III Xornada de Literatura Dramática baixo o título “A palabra teatral nas aulas”. Este ano, inclúe unha convocatoria a dramaturgxs para participar no Festival “Pezas dun teatro do porvir”.

O programa completo previsto é este:

 

Mañá

10:00 Mesa redonda 1. A literatura dramática galega no último cuarto do século XX.

11:25 Mesa redonda 2. A literatura dramática galega nas primeiras décadas do século XXI.

12:45 Mesa redonda 3. O teatro nas aulas.

 

Tarde

16:00 Festival Pezas dun teatro do porvir. Procesos abertos de escrita dramática.
Dentro das actividades desta III Xornada, establécese a seguinte proposta aberta, para a que xa está aberto o prazo de inscricións:

Festival Pezas dun teatro do porvir. Procesos abertos de escrita dramática.

Convocatoria aberta a 4 dramaturgas/os que estean a escribir algunha peza nova ou que teñan unha peza recente e queiran abrila ao público amosando un fragmento ou mostra desta. Terá lugar unha exposición ou mostra dun fragmento da peza (máximo de 15 minutos), e haberá un tempo complementario para un breve debate ou conversa ao seu respecto (máximo 15 minutos). As presentacións faranse no formato que cada dramaturga/o considere máis axeitado á peza que vai amosar a través dun fragmento desta.

No breve debate posterior ás presentacións buscaríase coñecer a reacción do público, nun diálogo que, quizais, poida servir para enriquecer, por parte da/o dramaturga/o, o acabado desas pezas en proceso.

Condicións:

  • Asígnase un orzamento total de 300 euros para cada proxecto seleccionado.
  • O prazo para a presentación de propostas remata o 8 de outubro de 2018. Enviaranse ao correo electrónico oficina@aelg.org

 

18:30 Clase maxistral a cargo de José Maria Vieira Mendes, recoñecido dramaturgo portugués.

Aberta a todas as persoas interesadas. O autor falará sobre as relacións entre literatura e o teatro, centrándose nos textos e contextos no teatro portugués actual, e posteriormente manterá un coloquio co público asistente.

 

A xornada desenvolverase no Espazo Normal (Paseo de Ronda, 47, A Coruña) e está coordinada por Afonso Becerra de Becerreá, vogal de Literatura Dramática da AELG, e Cilha Lourenço Módia, da Universidade da Coruña.

Deixar unha resposta