Despois dun mes cunha campaña de micromecenado aberta recadando fondos para a celebración dun festival en espazos urbano do barrio vigués de Bouzas, o Teatro Gorrilla conseguiu chegar ao mínimo para poder facer realidade este festival de tres días, contando coa colaboración de Síntese Vigo, formada por Cristina Cameselle e Geni Iglesias.
Xuntando forzas, prepararon un festival de danza e performance con obradoiros, faladoiros, jams e moito goce que arrancou hoxe e que se desenvolverá ata o sábado, 28 de setembro.
Programación
Xoves 26 de setembro
Ás 12h na ESAD (Escola Superior de Arte Dramático), da man de Cris Vilariño, fíxose un obradoiro de 3 horas de Body Weather, sistema de traballo creado en 1973 por Min Tanaka, mestre, coreógrafo e bailarín de danza butoh.
“É unha práctica integral exhaustiva de adestramento e actuación que investiga as interseccións do corpo e a súa contorna. Os corpos non son concibidos como entidades fixas e separadas, senón que están, da mesma maneira que o tempo meteorolóxico, cambiando constantemente a través dun sistema infinito e complexo de procesos que suceden dentro e fóra destes corpos. Estar á escoita con todo o corpo, cos poros da pel abertos, cos sentidos e con sensibilidade, significa prestar atención a nós mesmos, aos outros e á nosa contorna”.
Ás 19h na Asociación de Veciños de Bouzas (na parte de abaixo) presentarase o festival, a súa programación en detalle, varias videodanzas e varios proxectos culturais da cidade que patrocinaron o festival, como A Morada e Caixa de Ritmos.
Ás 20h na Asociación de Veciños de Bouzas (tamén na parte de abaixo) abrirase un faladoiro en torno ao tema “corpos vulnerables en escena” convidando a axentes en relación ás artes escénicas como a PAM (Profesionais das Artes do Movemento), Fundación Igualarte, as artistas que participan no festival, A Panadaría, Ensalle, Afonso Becerra, alumnado da ESAD, Meiga – I. Será moderado pola organización do festival, que son artistas da escena.
Venres 27 de setembro
No CEIP Virxe do Rocio impartirá un obradoiro para 5º e 6º de primaria a compañía Disiden.Cia (Marcia Vazquez e Martin de Los Arcos), que achegarán ao alumnado a unha práctica de movemento con conciencia LGBTIQ+. Trátase dunha actividade para reflexionar sobre as identidades, os estereotipos de xénero e a diversidade de corpos a través do movemento.
“Pór en valor o colectivo, o apoio grupal, a xeración de grupo, incentivando un espazo próximo onde as crianzas ou adolescentes poidan expresar os seus conflitos con respecto a identidade de xénero. Xogar cos corpos, convertelos en animais, monstruosidades, seres híbridos coa pregunta sempre no ar: Quen somos? Que queremos ser?”
Ás 18h na AA.VV de Bouzas desenvolverase un obradoiro de creación de público pola compañía de danza Ay, Cariño!, de 45 minutos aberto a quen queira participar e coñecer a peza que se mostrará o día seguinte dende un lugar de non ser espectador, senón que pondo o corpo.
Ás 19h na AA.VV de Bouzas impartirase un obradoiro de creación de público da compañía iXa de 45 minutos no que afondarán nas ideas que deron forma á peza Ollos cara adentro, que se presentará o sábado dentro da programación do festival.
Ás 20h na AA.VV de Bouzas farase unha jam de movemento musicalizada por David Santos, baixista da banda Cró! Aberta a calquera corpo, con ou sen coñecemento en danza.
SÁBADO 28 de setembro
12h no Paseo dos Peixes, Bouzas. Ofrecerán un percorrido artístico con Elsa Pereira dunha hora, descubrindo Bouzas con outro ollar, unha experiencia sensorial e única.
Explanada fronte a Praia do Adro, Bouzas
Ás 18h Disiden.Cia amosa a súa peza Podería ser calquera, unha danza para calquera. “É unha reivindicación monstrosa, alieníxena, absurda e desenfadada dos corpos. O apoio noutres como forma de vivir na constante dúbida. Permitirse, hoxe, ser calquera. Un espectáculo para tódalas idades na pregunta sen resposta sobre a identidade”.
Ás 19h iXa presenta a peza Ollos cara adentro, unha proposta escénica de dous performers que traslada a concepción surrealista do soño a un espazo físico efémero, tomando como punto de partida o universo do onírico. Ollos cara adentro pretende indagar na concepción surrealista do soño; ese lugar onde os límites da lóxica, a razón, a conciencia e incluso as convencións do gusto rompen permitindo abrir unha porta entre o mundo interior e exterior de cada individuo.
Ás 20h Ay, Cariño! con WTF, unha fuxida cara diante, o correr pavoroso de dúas criaturas chegadas á Terra dende un planeta lonxano e estraño. Ou simplemente diferente.
“É unha explosión. É un carnaval. É un disparate.
É unha expresión de shock convertida nun absurdo de ritmo frenético. Unha mestura de xogo e movemento que dende a cor e o brillo cristaliza unha idea sinistra tras a néboa da festa: por que corren estas dúas criaturas? Que ven que lles fai fuxir sen pausa cara diante? Que lles aterra tanto?
Quizais non lles gusta o que ven aquí abaixo. Ou quizais esas criaturas chegadas doutra galaxia somos todxs nós reflectidxs nun espello inesperado. Correndo ata quedar sen alento para chegar a non sabemos onde”.
Por último, dende as 22h no Palco da Música da Alameda Gorrilla Dj Set ata as 23h pecharase o festival festexando con moito baile.
O proxecto
Teatro Gorrilla é un proxecto autoxestionado e alternativo que Sergio Llauguer, Laura Merchán e Eva Comesaña levan a cabo, pretende “transformar e democratizar a cultura na cidade olívica, levando propostas contemporáneas de artes escénicas aos bares, lugares cheos de vida que apoian a arte a través de múltiples concertos, por iso, queren que as artes escénicas tamén teñan presenza nestes espazos non convencionais, e así, visibilizar novas propostas de artistas independentes da Galiza”.
Este proxecto comezou “como resposta á baixa visibilidade das artes escénicas e a escaseza de espazos para a súa práctica e desfrute na cidade de Vigo”.
