O Estudio Teatral CasaHamlet de A Coruña, creado por Manuel Lourenzo e Santiago Fernández en 1998, decide levar adiante a edición dunha revista co mesmo nome, de periodicidade anual e contando sempre co patrocinio da Deputación de A Coruña. O seu primeiro número aparece en 1999 editándose catorce en total até a súa desaparición en 2012 sempre coa dirección de Francisco Pillado Maior.
Deseñada con primor, en lingua galega, a súa concepción ten certa semellanza con Art Teatral no sentido de que vai recoller textos breves, teoría e ilustracións de artistas plásticos de Galicia.
Sempre arredor dun tema: Cunqueiro, Teatro histórico, A cidade, Personaxes, Xesús Pisón, O amor, Hamlet, Dramaturg@s… E este que salientamos: Monólogos.
No seu editorial, dedicado a Luísa Villalta, podemos ler: Como forma teatral, o monólogo, é unha clase de discurso que por ir dirixido a un interlocutor ausente ou a ninguén en particular, tampouco busca a réplica; a resposta do outro non é o seu obxectivo…
Velaquí a finalidade deste monográfico, analizar o tema por dentro e por fóra!
Teremos a oportunidade de ler creacións de Xabier Abalo, Raúl Dans, Lois diéguez, Isaac Ferreira, Xosé Manuel García, Joâo Guisan Seixas, Xavier Lama, Manuel Lourenzo, Xoán Carlos Mejuto, Chus Pato, Jacobo Paz, Gustavo Pernas Cora, Xesús Pisón,
Henrique Rabuñal, Euloxio R. Ruibal, Roberto Salgueiro, Carme Sotelo e Natalia Sueiro.
Unha trintena de artistas plásticos colaboran neste número entre os que citamos ao azar: Fina Pita, X.Vizoso, Sofía Falero, Sabela Baña, Alberto Campo…
Un auténtico pracer para quen lle guste a plástica e o teatro: ir pasando lentamente as follas e ir lendo.
E para saber máis… teclear en google o nome do artista descoñecido!
