O Fondo Teatral María Casares (FTMC)
O Fondo Teatral María Casares está integrado na Biblioteca Pública de Cangas do Morrazo (Praza de San Xoán, 10, 36940 Cangas) e é o resultado dun Convenio asinado no ano 1995 entre o Concello de Cangas, a Asociación Cultural Entre Bambalinas –editora da Revista Galega de Teatro– e a Compañía Teatro de Ningures.
Formado inicialmente pola cesión de fondos bibliográficos e diversas coleccións de revistas especializadas destas dúas entidades vaise enriquecendo progresivamente grazas ás continuas achegas de libros e revistas que, recibidas na redacción, se reseñan na erregueté | Revista Galega de Teatro e posteriormente pasan a inventariarse na Biblioteca.
A Asociación Cultural Entre Bambalinas quixo nomear así o FTMC en memoria e homenaxe á actriz María Casares (A Coruña 1922-París 1996), quen aos 14 anos tivo que exiliarse en Francia debido ao golpe militar franquista de 1936. Era filla de Gloria Pérez e Santiago Casares Quiroga, ministro e xefe de goberno da II República.
O Fondo conta actualmente con arredor dun millar de volumes e revistas, que son unha base moi útil para todas as persoas interesadas polo feito teatral, sendo un depósito especializado en teatro único en Galicia.
Ademais de libros e revistas, o fondo conta con gravacións de vídeo, fotografías, montaxes e outros materiais de interese. O Fondo Teatral María Casares organiza tamén exposicións e outras actividades, subministrando información sobre diversos acontecementos teatrais: cursos de teatro, festivais, certames, etc. e proxecta ademais converterse nun centro de documentación sobre toda a actividade teatral xerada ao longo dos anos.
Vaia pois desde aquí a invitación para que as compañías e grupos de teatro e outras asociacións con actividade teatral proporcionen todo o material (programas de man, carteis, fotografías, …) que contribúan a perfeccionar este fondo.
Máis sobre a erregueté | Revista Galega de Teatro: