O Camões – Centro Cultural Portugués en Vigo apoia o III Festival das Linguas e as Culturas, organizado polo Instituto de Investigación Lingua (iLingua) da Universidade de Vigo, unha iniciativa que se realiza no ámbito do Día Europeo das Linguas e que ten como obxectivo promover a diversidade lingüística, o diálogo intercultural e a valoración das diferentes culturas.

O apoio do Camões – Centro Cultural Portugués en Vigo concretase través da participación do Eu.Experimento – Grupo de Teatro Amador en Portugués do Camões/CCP-Vigo, que presentará a súa máis recente produción teatral, Um copo com Mário Viegas, un espectáculo desenvolvido polo grupo con dramaturxia e dirección de Afonso Becerra de Becerreá e interpretación de António Barreiro, Patrícia de la Fuente, Carmen Lois e Letícia Monteiro.

A peza constitúe unha homenaxe ao mítico actor portugués Mário Viegas (1948–1996), sinalando, en 2026, os 30 anos da súa morte. En ton de verán e de teatro, Um copo com Mário Viegas preséntase como un cóctel teatral composto por humor, absurdo e memoria, evocando tamén textos de Mário-Henrique Leiria e o espírito irreverente que marcou o percorrido artístico de Mário Viegas.

O espectáculo poderá verse o sábado 26 de setembro de 2026 ás 18h no Edificio Redeiras da Universidade de Vigo, na Praza da Ribeira do Berbés.

Ao longo do día, o público poderá participar gratuitamente nun programa diversificado que inclúe actuacións de música e danza, obradoiros, actividades culturais, demostracións artísticas e outras iniciativas dedicadas á promoción das linguas e das culturas do mundo.

O festival conta coa colaboración de diversas embaixadas, institucións culturais, asociacións e entidades locais, promovendo un espazo de encontro, partilla e celebración da diversidade cultural e lingüística.

A entrada é libre.