O Festival Internacional Galicreques, organizado pola Asociación Barriga Verde co apoio e patrocinio de institucións como a Xunta de Galicia (a través da Agadic), o Concello de Santiago, a Deputación da Coruña, o Ministerio de Cultura e Deporte a través do Inaem e a Fundación SGAE, traerá a Santiago de Compostela compañías e artistas procedentes de once países durante a súa 31ª edición, que se celebrará entre o 10 e o 18 de outubro.

Procedentes de Galicia estarán Espagueti Títeres, Títeres Alakrán, Micromina Títeres, Uxía Algarra, Marcos PTT e Teatro Escena.

Dende Portugal virá Marionetas Rui Sousa, mentres que de Italia chegará a compañía Zaches. Colombia, pola súa banda, achegará tres compañías diferentes ao cartel: La Pepa del Mamonicllo, La libélula Dorada e Aria Teatro. Abril Abrils, Títeres en vuelo e Manu Mansilla chegarán dende Arxentina, mentres que Vagabundo Títeres virá de Chile e Ocelot Teatro, do Salvador; Coriolis Teatro, de Uruguai, e Habib&Valeria, do Brasil.

Estarán no cartel do Galicreques 2026 tamén compañías españolas como Teatro Arbolé (Aragón), La Gotera de la Azotea (Andalucía), La Tartana (Madrid) ou La Estrella (Valencia).

Premio Galicreques 2026

A presenza internacional do Galicreques deste ano complétase con dous nomes que chegan como convidados pola Rede de Festivais Internacionais de Teatro de Títeres e Obxectos (RITTO): a directora chinesa Forrina Chen e o indio Dadi Pudumjee, presidente de honra de UNIMA Internacional, que será galardoado co Premio Galicreques 2026.

Dadi Pudumjee (nado en Pune, Maharashtra, na India, en 1951) é un monicrequeiro, director, pedagogo teatral e coordinador de festivais. Estudou comunicación visual e formouse no teatro de monicreques na Academia Darpana de Arte Dramático. A súa formación completouse no Instituto de Teatro de Marionetas de Suecia. En 1979 traballou no PuppenTheater de Berlín e, un ano despois, regresou á India para fundar e dirixir o primeiro teatro de repertorio moderno de marionetas na India: O Sutradhar Puppet Theatre, en Nova Delhi. Posteriormente, impulsou diferentes iniciativas escénicas e fundou a súa propia compañía The Ishara Puppet Theatre Trust.

A súa presenza en Galicreques inclúe un curso de Construción de Títeres xigantes. Este obradoiro é un dos tres talleres ofrecidos nesta edición do festival. Os outros dous son A arte da máscara, impartido pola compañía italiana Zaches Teatro, e Drag-Máscara-Bufón, a cargo de Nauta Teatro.

Podes consultar aquí a programación completa do Galicreques 2026.