Crítica

Um museu vivo de memórias pequenas e esquecidas

Unha voz con voces para re(con)stituír a memoria

| Vanesa M. Sotelo |

Craveiro

 

O silencio pódese impoñer; o esquecemento, non. Por iso é preciso preparar o espazo para que a memoria fale. Con Um museu vivo de memórias pequenas e esquecidas, Joana Craveiro constrúe o dispositivo necesario para rescatar e amplificar as voces do pasado. Faino a través de historias individuais que atravesan as oito últimas décadas da historia de Portugal –desde a instauración da ditadura militar que daría orixe ao Estado Novo ata os corenta anos que sucederon á Revolución do 25 de abril. Concibido como teatro-documento, Un museu vivo de memórias pequenas e esquecidas é, ante todo, unha experiencia desde a que reconstituír a memoria e restituír a identidade de varias xeracións que aínda se preguntan que foi a revolución e se esta acabou ou aínda está por facer.

“Pódese falar das contradicións dun país e das complexidades da súa historia durante catro horas e media coa forma dun monólogo?” Esta é unha das preguntas sobre a que se estruturou o presente traballo da compañía Teatro do Vestido e a resposta, positiva, queda patente na acollida do público no Teatro-Estúdio António Assunção durante o XXXII Festival de Almada. Joana Craveiro asenta a súa proposta nun traballo de investigación e documentación intenso e rigoroso que desemboca nunha execución escénica intensa, intelixente, esixente e medida con grande honestidade. Estruturado en sete partes –con prólogo e epílogo- este museo é un espello desde o que poder recoñecerse e descubrirse na historia coa guía da palabra en combinación cunha coidada selección de elementos visuais e rexistros sonoros.

Um museu vivo de memórias pequenas e esquecidas é, por riba de todo, unha experiencia intensa, extensa e próxima. A proximidade formúlase desde o inicio e desprégase a cada paso coa exposición de vivencias que abordan o universal desde a memoria local e o persoal. No percorrido que deseña este museo-teatro-experiencia, Craveiro rescata a figura dos heroes e das heroínas anónimas, recupera os pequenos actos da resistencia que poñen en valor a importancia da cultura e sitúa a actualidade en diálogo co pasado. A proximidade que require a proposta complétase ademais coa enerxía desbordante e o verbo imparable cos que Craveiro atrapa e implica a cada persoa asistente. Ela é portavoz e altofalante. A súa presenza prepara o terreo para asistir á conmoción, á emoción, ás nostalxias, ás esperanzas, as frustracións, ás vitorias e ás utopías.

Un museu vivo de memórias pequenas e esquecidas conta, mostra, comparte, fala, cuestiona, reivindica, denuncia, visibiliza, revive, reconstrúe, fai presente. O espectáculo constitúe un patrimonio de gran valor para restituír a memoria –non só portuguesa, mais ibérica- ameazada por políticas que intentaron destituír identidade e memoria. A súa é unha voz chea de voces que desafía a dar pasos de futuro. É unha man que recupera poemas escritos no aire con espiñas de peixe para saber que somos e que facemos aquí ou cara onde imos. É unha mirada que cuestiona e acende pensamentos adormecidos como a pregunta que apuntaba unha espectadora que confesaba sentirse culpable por non ter sido nin presa nin mártir como outros compañeiros. A súa pregunta era: “Será que a revolución está aínda por facer?”

 

Um museu vivo de memórias pequenas e esquecidas
Compañía: Teatro do Vestido
Investigación, texto, dirección e interpretación: Joana Craveiro
Colaboración creativa: Rosinda Costa e Tânia Guerreiro
Figurinos: Ainhoa Vidal
Deseño de luz: João Cachulo
Dirección técnica: Carlos Ramos
Produción: Cláudia Teixeira
Asistente de produción: Igor de Brito

Festival de Almada. Teatro-Estudio António Assunção, Almada. 12 de xullo de 2015.

 

 

 

Ficha artística

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos