Unha característica da Feria de Teatro de Castilla y León son as pezas ao aire libre gratuítas, xeralmente de circo. Una parte de mí, da CIA O Último Momento, era unha delas, e puiden vela en Ciudad Rodrigo o día 23 de agosto.
Na peza, destacan especialmente o traballo do acróbata João Paulo Santos, acompañado polo espazo sonoro de Tiago Cerqueira. Neste espectáculo amosan o dominio que teñen sobre as súas respectivas especialidades, pero tamén a súa sinerxía, xa que corpo e son van da man, sen pelexas nin confrontacións.
Una parte de mí é unha peza de circo, na que se traballa co mastro chinés, e que nos propón unha viaxe co acróbata e a súa disciplina. João parece un astronauta. Ás veces, a gravidade semella non afectarlle, de xeito que o público pode gozar da súa coreografía, e do diálogo que se xera entre o seu corpo e o fermoso casco vello de Ciudad Rodrigo. João é un deses acróbatas que fai aparentar a súa arte como algo sinxelo, como algo natural para o seu corpo, e inaccesible para o resto de seres humanos, que só podemos observar dende a terra como este astronauta toca o ceo da vila.
A peza faite transitar emocionalmente xunto ao acróbata, coas súas subidas e baixada, e a música achégate ese sentir, en perfecta harmonía co corpo. A pesar da brevidade do espectáculo, a viaxe é moi rica, grazas ás tensións e distensións que producen ambos artistas. Isto queda claro cando ves os cativos que asistiron ao espectáculo. Aínda non teñen a sensación de decoro, e as súas reaccións durante a peza eran puras. Algúns, nos momentos nos que sufrimos polo acróbata, foron correndo cara ás súas nais.
Resumindo, Una parte de mí oferta toda unha experiencia grazas á destreza e entendemento dos participantes no espectáculo, e que con poucos elementos, acompaña o espectador a unha viaxe de emocións e sensacións.
