O domingo 13 de xullo tiven a oportunidade de ver a última (que non derradeira) función de Costa da morte, cartografía dun naufraxio, espectáculo debut da actriz Mariña Lestón, en coprodución co Centro Dramático Galego, no Museo do Mar de Galicia.
A peza é un monólogo que trata unha das problemáticas máis destacables da historia do noso país, os naufraxios, centrándose na zona da Costa da Morte, da que ela é nativa. Nesta peza podemos ver a pegada dos naufraxios na nosa cultura, mediante as cantigas que tratan destes, pero tamén imos ao particular, xa que Mariña pon o seu corpo á disposición de tres testemuñas, dando vida a persoas afectadas polos naufraxios, de xeito directo ou indirecto.
Cartografía dun naufraxio pon en valor a historia popular de Galicia, xa que, encarnando as afectadas, a actriz se torna nun altofalante para as persoas que sempre son esquecidas da Historia de Galicia con maiúsculas, poñendo o foco no común, e no contexto do Museo do Mar de Galicia, isto resulta especialmente valioso.
O espectáculo conta cunha posta en escena simple, pero a actriz é quen de encher o espazo cunha presenza amable, pero potente, e chea de detalles. Grazas a isto, consegue que todas as persoas que encarna aparezan en todos os recunchos do seu corpo, incluso nas comisuras dos beizos. O espazo escénico, de Carlos Alonso, é consciente do seu lugar nesta proposta, e serve de apoio para a actriz, sendo así un moi bo compañeiro de escena.
Con isto, podemos dicir que Costa da Morte, cartografía dun naufraxio é unha peza necesaria, que estuda a nosa relación como pobo co mar, elemento fundamental na nosa identidade como galegas, e que nos coloca en fronte de experiencias que de xeito sistemático adoitamos esquecer.
- Cicatriz - 30/12/2025
- Domingo no teatro da man do Gorrilla - 21/11/2025
- Costa da morte, cartografía dun naufraxio - 05/08/2025
