Este traballo de Pilar García Negro, publicado no ano 2008 cando a Real Academia Galega lle dedicou o Día das Letras a Álvarez Blázquez, preséntanos un resumo da vida e da actividade cultural do suxeito obxecto de estudo. O libro está estruturado en sete partes, facendo un paralelismo coas sete décadas que lle tocou vivir a Álvarez Blázquez. Deste xeito, a autora preséntanos un relato no que vai contando os aspectos máis relevantes tanto do contexto histórico, social e cultural, como da propia vida do autor homenaxeado.

Ao longo do libro podemos facernos unha boa idea do ambiente no que lle tocou nacer e vivir. Era a súa, unha familia de intelectuais, o cal favoreceu desde moi cedo a súa vocación literaria. O seu avó, Emilio Álvarez Giménez, foi o autor de dúas pezas de teatro A casamenteira e Mari-Castaña, publicadas ambas nos Cadernos da Escola Dramática Galega.

Nos seus comezos na vida cultural e política de Galiza, Álvarez Blázquez estréase como orador político motivado por Alexandre Bóveda, con quen compartía lazos familiares, nun acto homenaxe aos mártires de Carral. Unha etapa que tristemente mudaría radicalmente a súa vida foi a producida polo golpe de estado de 1936 e os fusilamentos de tantas persoas, entre elas o propio Bóveda e os irmáns Darío e Xosé Álvarez Limenses; respectivamente, pai e tío de Álvarez Blázquez. É tamén desta etapa o seu desterro a Zamora.

A partir do seu regreso en 1946 a Galiza, retoma con moitísimas dificultades a súa vida cultural, mais non a política, totalmente reprimida. Desta época son as súas dúas obras de teatro en castelán: Los pazos altivos e El zapato de cristal.

Nas últimas partes do libro podemos coñecer o seu intenso labor xa non só como autor, tamén como editor e divulgador, pois foi o seu propósito publicar obras fundamentais da literatura galega para chegar ao maior número posible de lectores.

Este libro é moi acaído para traballar en secundaria. De feito, o obxectivo principal da súa publicación foi facer chegar ao alumnado dos institutos, e á mocidade en xeral, o exemplo de Xosé Mª Álvarez Blázquez.

Pilar García Negro ten unha traxectoria política e cultural intensa, sempre co afán de dignificar a cultura e a lingua galega, outorgándolles o estatus que lles corresponde. Este traballo, ao igual que todos os seus, é riguroso e tremendamente útil para coñecer mellor diferentes aspectos relacionados coa nosa historia e a nosa cultura. Entre a súa obra destacan os estudos relacionados con Lamas Carvajal, Castelao, Rosalía de Castro ou Carvalho Calero, homenaxeado o pasado 2020 no Día das Letras Galegas.