in

Titirideza 2019 homenaxea o teatro de barraca

barracaBarrigaVerde
O programa comeza o vindeiro venres 13 e leva a Lalín cinco compañías que representarán cinco espectáculos de barraca.

 

Os días 13, 14 e 15 de setembro, nas rúas e prazas de Lalín, o festival convida a gozar de espectáculos diversos para público diverso. Un convite que se realiza a través do cartel deseñado por Julia Ferradás.

Titirideza e Titerentroido son programacións vinculadas ao desaparecido Museo Galego da Marioneta o que, segundo os organizadores, obriga a unha reflexión sobre seu futuro.

PUBLICIDADE

A edición 2019 enmárcase no “teatro de barraca e barraquiñas”, teatros ambulantes que atopaban e atopan acomodo en prazas e rúas. Nas barracas habita o espírito que acompañaba os cómicos da legua, a Barriga Verde, o Teatro Júpiter, a Barraca de Lorca, as Misións pedagóxicas e tantas outras accións descoñecidas que acercaron o teatro ós lugares que carecían de condicións ou espazos axeitados para as representacións. Teatro de pequenos espazos e con funcións continúas cunha proximidade entre público e artistas que favorece a enerxía e a intensidade necesaria para o seu goce.

Na barraquiña de Cal y canto, na de La petite caravane e na Barraca de Barriga Verde, que aloxa os espectáculos de Miss LaCé & Roni Flamingo, de MãoZorra e de Títeres, amosarase o teatro de marionetas en toda a súa diversidade.

Entre os anos 1910 – 1960 a barraca da Familia Silvent recorre Galiza. A barraca comezou sendo unha lona vertical pendurada entre dúas paredes, tras a cal se manexaban os monicreques. Posteriormente Barriga Verde fíxose coa barraca de madeira. A modernidade da barraca era indiscutible: luz eléctrica e megafonía. No exterior, a barraca de José Silvent tiña un porche sustentado por catro columnas coroado cunha especie de tímpano. Este espazo servíalles aos Silvent para “facer a porta”, tratando de seducir ao público a mercar unha entrada. Co tempo, José Silvent engadiría o lema “El auténtico barriga verde” para diferenciarse doutros feirantes que utilizaban Barriga Verde como reclamo para as súas atraccións.

PUBLICIDADE

Durante a investigación da vida de Barriga Verde realizada por Viravolta, apareceron varias barracas que a familia empregou durante os máis de cincuenta anos de existencia. A reprodución da barraca feita por Viravolta foi inspirada en varias delas.

 

Programa

O día 13, de 18.00 a 20.00, na praza do Concello vello, terán lugar pases de 20 minutos de duración do espectáculo La petite caravane da compañía Adrián Conde. Cansado de que o rexeiten en todos os teatros, o artista de variedades máis pequeno do mundo decide montar o seu propio, e non só o fai acorde ás súas medidas, senón que tamén lle pon rodas para levalo a todos os recunchos do mundo.

Ese mesmo día, ás 22.00, na Praza da Igrexa, Miss LaCé & Roni Flamingo representan Amosa Burlesque, un espectáculo picante de burlesque e cabaré cun toque de humor para un público adulto. O burlesque tivo o seu esplendor en América nos anos dourados de Hollywood. Amosa Burlesque trae a música dos anos 40, 50, 60… vestiario marabilloso e momentos únicos. Un espectáculo sen vergoñas, con humor, e moito glamour. Un espectáculo canalla e divertido

O día 14, con sesións ás 13.00, ás 17.30 e ás 19.30, na Praza de Loriga, a compañía burgalesa Cal y Canto representa Last Dog para público familiar, un espectáculo gañador do premio ao mellor espectáculo en espazo non convencional en FETEN 2017 e finalista ao mellor espectáculo de rúa nos Premios Max deste ano. Construída cos materiais reciclados que abundan en calquera suburbio, a chabola de Lost Dog permítelle ao público entrar nun ambiente rueiro. Un espectáculo de monicreques e obxectos, no que os pés e zapatos dos actores operan como os suxestivos condutores dunha emocionante historia. Unha perspectiva sorprendente para o público: o mundo visto cos ollos dun can.

Ás 21.00, na barraca de Barriga Verde, na Praza da Igrexa, Viravolta representa Barriga Verde, unha recreación da compañía da barraca de José Silvent. O Barriga de Verde de Viravolta títeres mestura a tradición do títere galego coa europea, recolle cinco situacións que Barriga Verde –en compañía da súa cachaporra– resolve dun xeito que incomoda ao Demo que asiste á invasión do seu inferno por personaxes que non lle resultan gratos.

A obra Dom Roberto –baseado no tradicional personaxe da marioneta portuguesa– da compañía MaoZorra, fundada en 2012, que ten como obxectivo a promoción e produción de actividades, tradicionais e contemporáneas, no teatro de marionetas, será a encargada de pechar o programa, o día 15, con funcións ás 13:00, 17.30 e 19.30.

 

O custo da entrada para os espectáculos é: 1 euro (La petite caravane); 2 euros (Cal y Canto, Barriga Verde e MãoZorra) e 3 euros o espectáculo para adultos de Miss LaCé & Roni Flamingo.

PUBLICIDADE
PUBLICIDADE
Redacción

Redacción

Somos a erregueté | Revista Galega de Teatro.
A única publicación periódica que ten como obxecto as artes escénicas galegas dende 1983.

Deixa unha resposta

Avatar

O teu enderezo electrónico non se publicará

GIPHY App Key not set. Please check settings

    MartaPazos

    Voadora leva ao Centro Dramático Nacional ‘Siglo mío, bestia mía’

    1040D635 9E74 47D2 924E 88D4D395E3C9

    Nuria Espert abre o programa do Teatro Principal de Ourense