Actualidade

PUBLICIDADE

Curva España, a nova produción de Chévere, continuará a súa xira durante o ano 2020. Así, no mes de xaneiro o espectáculo poderase ver en Vigo (día 16), Pontevedra (día 17), Lugo (día 19), Ourense (días 24 e 25) e Ames (día 31). Ademais, proximamente a obra viaxará a Eibar e Vitoria. No mes de marzo, poderase ver durante 10 días en Teatros del Canal de Madrid.

 

Curva España estreouse o 25 de xullo deste ano na MIT de Ribadavia e foi vista xa por máis de 6.000 expectadores. Este novo traballo de Chévere está protagonizado por Patricia de Lorenzo e Miguel de Lira, con dramaturxia e dirección de Xron. En escena tamén están Lucía Estévez e Leticia T. Blanco, que se ocupan da gravación e realización de vídeo en directo.

Coproducido xunto con Teatros del Canal, a MIT de Ribadavia e o Concello de Teo, a obra trata sobre un crime aparentemente sen resolver, unha morte violenta que provoca sospeitas e interrogantes sobre os seus autores, motivacións e consecuencias. A partir da existencia de distintas versións sobre o caso, artéllase unha peza que bebe do xénero policial, ironiza sobre o formato documental combinando teatro e cine en directo e funciona como unha alegoría da construción do estado nación español coma se fose a promesa dun tren que nunca chegou. Porque a esta zona afastada e fronteiriza España apenas chegou en forma de mito, e o mito fala da súa morte nunha curva.

As próximas funcións de Curva España serán en:

  • Vigo: 16 de xaneiro ás 20:30 no Teatro Afundación. Entradas en ataquilla.com
  • Pontevedra: 17 de xaneiro ás 20:30 no Auditorio Sede Afundación. Entradas en ataquilla.com.
  • Lugo: 19 de xaneiro ás 18:30 no Auditorio Gustavo Freire. Entradas en www.entradaslugo.es.
  • Ourense: 24 e 25 de xaneiro ás 20:00 no Teatro Principal. Entradas en www.ataquilla.com.
  • Ames: 31 de xaneiro, ás 20:30 no Centro Sociocultural de Bertamiráns

 

Sobre Curva España, a historia da curva na que se matou España

Nos últimos anos, Chévere realizou unha serie de traballos que exploraron as posibilidades do teatro-documento e a memoria colectiva como desencadeantes dunha ficción teatral (Citizen, Eurozone, Eroski Paraíso…). Este novo proxecto é un paso máis para afondar nos mecanismos narrativos que xorden na fronteira entre a realidade e a ficción, entre a historia e a lenda, entre a pantalla e o escenario.

Coma outras veces, pártese dunha historia moi local. Nesta ocasión trátase dun relato que se foi transmitindo oralmente de xeración en xeración entre a xente da comarca de Verín (Ourense), durante os últimos noventa anos. Recolléronse in situ os testemuños da xente, os seus recordos e as súas palabras. Organizouse o rexistro de todo este traballo en gravacións sonoras ou en vídeo. E con todo este material Chévere meteuse no local de ensaios para darlle forma teatral. Poñer a historia a proba, reconstruír as voces dos seus protagonistas cos actores e actrices, crear situacións ao seu arredor, escribir sobre a marcha e a pé de escenario o que teñen que dicir.

Curva España é a traslación á escena dun deses documentais sobre casos sen resolver que inzan as plataformas de contidos audiovisuais tipo Netflix ou HBO. O escenario funciona coma un plató no que se van executando, gravando e editando en directo as distintas secuencias nas que se estrutura a historia. Unha historia que dá para falar da España baleirada, das consecuencias da lei mordaza, da unidade nacional ou de como a xente constrúe narrativas alternativas á historia oficial. Pódese describir como unha obra cinescénica, unha autoficción documental, sen renunciar a seguir facendo un teatro político que fala de nós mesmos e de como as promesas incumpridas do pasado afectan ao presente.

 

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos