Dous premios para a adaptación de Eroski Paraíso, de Chévere, e un para o documental sobre Marcelo Ndong, “o pai do teatro de Guinea Ecuatorial”, foron as achegas do teatro a uns Mestre Mateo liderados por O que arde, a terceira película de Oliver Laxe.

 

Miguel de Lira e Patricia de Lorenzo levaron os premios a Mellor Actor e Mellor Actriz protagonista na Gala dos Premios Mestre Mateo. Ambos levaron os galardóns dos premios cinematográficos polos seus papeis na versión cinematogrñafica de Eroski-Paraíso, a obra de Chévere dirixida por Jorge Coira e Xesús Ron.

Ademais, Manoliño Nguema, de Filmika Galaica, dirixida por Antonio Grunfeld, gañou o Premio ao Mellor Documental. O filme relata a vida de Marcelo Ndong, o artista que viaxou a Galicia en 1968 grazas a unha bolsa de estudos que lle permitiu formarse no Circo dos Muchachos de Bemposta e que acabou creando a primeira escola de circo de Guinea Ecuatorial e converténdose no “pai do teatro de Guinea Ecuatorial”.

Xan Cejudo obtivo, a título póstumo, o premio ao Mellor Actor Secundario polo seu papel en Quen a ferro mata.

 

A longametraxe de Oliver Laxe, O que arde, foi a gran vencedora da XVIII gala dos premios Mestre Mateo, que tivo lugar na noite do sábado, facéndose con seis galardóns de doce categorías nas que optaba a premio, entre eles as de mellor longametraxe e mellor dirección. Os premios tamén recoñeceron a dirección de arte de Samuel Lema e Curru Garabal, o traballo na dirección de fotografía de Mauro Herce, na montaxe de Cristóbal Fernández e no son de David Machado, Amanda Villavieja, Sergio Silva e Xavi Souto.

Hierro, a serie de Portocabo, Movistar +, Arte France e Atlantique Productions, obtivo catro galardóns, como mellor serie de televisión, mellor dirección de produción para Ana Míguez, mellor guión para Pepe Coira, Fran Araújo, Araceli Gonda, Coral Cruz e Carlos Portela, e mellor música orixinal para as composicións de Elba Fernández e Xavi Font.

Quen a ferro mata, que partía como favorita con quince candidaturas, só obtivo tres premios: ademais do xa mencionada galardón a Mellor Actor Secundario para Xan Cejudo, tamén conseguiu o de Mellor Actriz Secundaria para María Vázquez e Mellor Maquillaxe para Susana Veira e Beatriz Antelo.

O traballo de María Fandiño en Lobos e Cordeiros acadou o premio á Mellor Vestiario, mentres que Lucía Regueiro obtivo o premio de Mellor Comunicadora polo seu traballo en Bamboleo.

Ademais de premiar a excelencia dos profesionais e producións do ano, a Academia aproveita os Mestre Mateo para recoñecer a traxectoria de profesionais relevantes do audiovisual en Galicia co Premio de Honra Fernando Rey, que este ano foi para o proxeccionista do CGAI-Filmoteca de Galicia José Maria Rodríguez Armada, Chema.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos