Actualidade

A Deputación cede ao Concello da Coruña a xestión do Teatro Colón

PUBLICIDADE

A Deputación e o Concello da Coruña acordan o cambio na xestión do Teatro Colón que pasará o vindeiro 2 de xullo a ser municipal, integrándose no Instituto Municipal Coruña Espectáculos (IMCE). O presidente e a vicepresidenta da Deputación, Valentín González Formoso e Goretti Sanmartín Rei e o alcalde e concelleiro de Culturas da Coruña, Xulio Ferreiro e José Manuel Sande deron conta esta mañá dos termos do acordo.

 

A Deputación da Coruña cederá ao concello a xestión do Teatro Colón por un prazo de dous anos, prorrogables por outros dous, e fará unha achega anual de 500.000 € para sufragar os gastos de xestión e programación. A institución provincial reservarase trinta días de uso e formará parte da comisión e seguemento da programación do centro cultural. Son estes algúns dos puntos que inclúe o acordo de cesión de xestión que hoxe fixeron público en roda de prensa o presidente da Deputación, Valentín González Formoso, o alcalde da Coruña, Xulio Ferreiro e como responsables das áreas de Cultura das dúas institucións, a tamén vicepresidenta Goretti Sanmartín Rei e o concelleiro José Manuel Sande.

O presidente da Deputación da Coruña, Valentín González Formoso, mostrou a satisfacción polo acordo despois dun longo e complexo proceso administrativo. “O resultado ten unha mensaxe clara para a cidadanía que é o acordo de dúas institucións, con gobernos de distintas forzas políticas e iso si que é nova política”, dixo González Formoso.

“Coa cesión da xestión estase a defender o mellor para a poboación e conséguese que dous equipamentos culturais a cen metros de distancia non teñan que competir entre eles, converténdose ademais nun centro de cultural de referencia non só local, senón metropolitano e provincial”, defendeu o presidente da Deputación da Coruña na súa intervención.

Pola súa parte, a vicepresidenta e deputada de Cultura, Goretti Sanmartín Rei, inseriu a cesión de uso do Teatro “dentro dun acordo de goberno en que se determinaba con clareza as competencias da Deputación, entre as que non se atopa a xestión dun teatro”. Goretti Sanmartín defendeu que “o normal é que exista unha planificación por parte do concello da programación cultural e que se insira na rede pública de centros da cidade”.

A deputada responsable da área de Cultura adiantou os temos do convenio que se fará efectivo a partir do vindeiro 2 de xullo e que suporá a achega de 500.000 euros por parte da Deputación da Coruña coa reserva de trinta días para “concellos e entidades que o soliciten co fin de servizo ao tecido social que viña facendo alí actividades culturais”. Goretti Sanmartín anunciou a creación dunha comisión de seguimento da programación que, segundo dixo, “velará pola continuidade na aposta pola cultura galega e a promoción da nosa lingua e pola programación de espectáculos de calidade”. Aplaudiu, neste sentido, o acordo institucional da Deputación e do Concello que, segundo dixo, “tiña que ser un exemplo de actuación para o ben común” ao tempo que lamentou que non se produza noutros casos como “coa Consellaría de Educación con quen solicitamos unha xuntanza para tratar o tema dos conservatorios municipais sen ter ningunha resposta”. Valentín González Formoso apuntou neste sentido a situación dos dous centros de menores da provincia a cargo da Deputación, “unha situación única de centros desa natureza que non depende da administración autonómica”.

 

Vocación metropolitana e mellor coordinación cultural

“Este é un día para felicitarnos porque demostramos que cando as institucións colaboran lealmente iso reverte no conxunto da cidadanía”, dixo o alcalde da Coruña, Xulio Ferreiro, que situou o acordo no conxunto doutras actuacións de colaboración entre a Deputación e o Concello. “Son múltiples as vías de colaboración e quero agradecer esa disposición a colaborar co Concello da Coruña”, sinalou. “Este teatro ten vocación metropolitana e iso tamén se está a entender desde a Deputación”, engadiu Ferreiro que anunciou a intención de darlle impulso á programación cultural da cidade por medio dun acordo de “dous anos anos que ten vocación de continuidade”.

O concelleiro de Culturas, José Manuel Sande, anunciou que o Teatro Colón será o quinto recinto que se xestione a través do IMCE e terá vocación, en especial, de promocionar músicas e públicos novos no que definiu como unha “reorganización dos recintos con identidade diferente”. Indicou tamén que o proceso de cesión vai unido a outras actuacións como “cobertura de persoal do IMCE e designación dun director que vai reforzar a entrada do Teatro Colón na rede de recintos culturais”.

O Teatro Colón, integrado no Pazo Provincial, foi adquirido pola Deputación da Coruña en escritura formalizada o 22 de abril de 1997, iniciándose un proceso de rehabilitación integral que remataría co edificio preparado para o seu uso a mediados do ano 2005.

O seguinte ano acórdase a xestión indirecta do Teatro Colón por medio da adxudicación dun contrato de concesión administrativa, modelo que se prolongaría, en dous períodos, até o pasado 28 de maio de 2017. Unha vez rematado, e despois dunha breve paréntese necesario para a elaboración do inventario e para accións de mantemento, desde setembro de 2017 é a Deputación da Coruña quen se puxo á fronte da xestión do centro cultural, contratando os servizos para o desenvolvemento da súa programación, nunha etapa que rematará o vindeiro 2 de xullo en que pasará a mans do Concello da Coruña.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!