O II Certame de Teatro Concello de Lourenzá comeza este venres, 2 de novembro, ás 21:00 horas, cunha representación a cargo do grupo Bule Bule, formado por actores e actrices de Alfoz e Lourenzá. O concelleiro de Cultura, Manuel Arango, anunciou o pasado mércores, que a gala de entrega de premios está programada para o 9 de decembro e unha das novidades desta edición é o Premio do Público.
Esta fin de semana, o grupo Bule Bule, de Alfoz-Lourenzá poñerá en escena a obra Xente con xente; será ás nove da noite. É un grupo formado por xente dos grupos Raiolas, de Alfoz, e Os Trangalleiros, de Lourenzá. O domingo actuará o grupo que gañou o ano pasado, Ollomao, de Barreiros, coa obra Oe, oe, oe, ás 20:00.
O certame continuará as próximas fins de semana: o sábado día 10, o grupo Rebuldeira (Sarria) porá en escena Delicadas e o domingo 11, Avelaíña (Pontevedra) representará María Castaña. O 17 de novembro será a quenda de Faro Miño (Chantada), con Langreira de amor e, o domingo 18, Os Palimoquiños (Lugo) levarán a Lourenzá Borralliña. Finalmente, o grupo Andanzas de Viveiro estará no certame con El caso de la mujer asesinadita o día 24 e Fauna 113 (Vigo) rematarán o día 25 con Deus, unha comedia.
O concelleiro de Cultura en Lourenzá salienta que as novidades deste ano consisten fundamentalmente no incremento do primeiro premio, que pasa de 600 a 750 euros, e nun novo premio do público.
