Actualidade

Javier Martín presenta o seu ‘Método negro’ en Madrid

PUBLICIDADE

Método negro, a obra máis recente do coreógrafo galego Javier Martín, preséntase en Madrid os días 14, 15 e 16 de febreiro ás 20h:00 no Teatro de Conde Duque, seguida dun coloquio co público.

 

Método negro (ver teaser) é a nova obra de Javier Martín, coreógrafo, bailarín e investigador galego cuxa traxectoria constitúe unha aposta firme polo desenvolvemento de novas linguaxes corporais. Un espectáculo de ecos expresionistas no que o bailarín transita durante unha hora por diferentes estados físicos e calidades de movemento, relacionándose con obxectos e accións simbólicas, que se van despregando nun espazo construído, paso a paso, ante o espectador. Método negro xira arredor das ideas de presenza e ausencia, de individuo e multitude, do paso do tempo e de como superar as estruturas formais que atravesan o noso sistema cultural, para conformar novas sensibilidades.

A peza circunscríbese ao ámbito das artes do movemento, situándose nalgún lugar entre a performance, a instalación, a acción contemporánea, a danza e os procesos de investigación. Unha coreografía de encontro con “o outro”, nun pulso co real e o seu dobre. Un exercicio que pretende declinar a ausencia: “A outra metade que non se ve, como o baleiro ao que volve o resplandor”.

A proposta artística identifica e traballa criticamente algúns dos sistemas asumidos pola ciencia contemporánea e a cultura popular xeral do corpo e o movemento, o que Javier Martín chama “metáforas performativas” (como pden ser leas técnicas). Sen esquecerse delas, Método negro traballa desde a súa constatación para sinalar como, na súa repetición, estas metáforas ou técnicas acaban por se volver inerciais. “A proposta de Método negro consiste en destilar como a inercia se acumula nos nosos corpos. Procúrase, deste modo, reflexionar e acometer novas prácticas ou métodos que consideren, na orixe, a súa desaparición. O desenvolvemento dunha arte madura que considere e contemple a súa propia desaparición”.

Trátase dunha produción ambiciosa, resultado dun ano de investigación persoal e de colaboracións con grupos diversos, que levaron ao autor por distintas cidades de Europa e Latinoamérica. Baixo a particular estratexia de combinar a investigación persoal co coñecemento compartido, Método negro foi desenvolvida en lugares tan singulares como os centros de residencia EIRA en Lisboa ou L’animal a l’esquena en Girona, a escola Totem Dance House en Kiev; o Museo del Chopo e a UNAM en Ciudad de México, a cámara anecoica da Universidade de Vigo ou a ETSAC-Escola Técnica Superior de Arquitectura da Coruña. Na última fase, contou co apoio do programa Residencias Paraíso, promovido polo colectivo rpm, para o desenvolvemento dunha residencia técnica no Teatro Colón da Coruña. Método negro estreouse en maio de 2018 no Teatro Rosalía Castro da Coruña.

Porén, a obra consta dun proceso de creación continuo, que sostén a convocatoria de grupos de traballo temporais. A presentación da peza no Conde Duque chega acompañada, así, de varias actividades paralelas: a celebración de coloquios co público tras as funcións; a convocatoria aberta dun obradoiro de movemento, “Cuerpo y vibración”, que terá lugar o sábado 16 pola mañá (gratuíto previa inscrición); e a celebración doutros encontros cun grupo de estudantes e profesionais da escena coordinado pola RESAD, e un grupo de estudantes de secundaria coordinado pola asociación Pasoa2.

 

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!