Actualidade

PUBLICIDADE

O Colectivo Verticalia, formado por compoñentes de Duelirium e Traspediante, estrea no Teatro Rosalía de Castro da Coruña, este venres 1 de marzo, ás 20:30, Alma (non é hippie), o seu primeiro traballo, que abre o ciclo o TRCDanza 2019.

 

Trátase dunha proposta de altura, xa que se constrúe a partir dun elemento principal: unha corda que colga do ceo dun teatro. Danza, verticalidade e poesía. As catro mulleres creadoras que estarán en escena –por unha banda Marta Alonso e Paula Quintas do Colectivo Traspediante e, polo outro lado, Raquel Oitavén e Mertxe Solé da compañía Duelirium– suman forzas baixo o nome de Colectivo Verticalia e contan, para esta primeira colaboración, coa dirección de Rolando San Martín e co apoio de Pistacatro.

Alma non cre na reencarnación, pensa que non fai falta ser tan hippie. Alma di que sen os demais, sen o outro, calquera deixaría de existir. Alma non se cre espiritual, senón que se sente así porque inspira e expira, inspira e expira.Alma di que a Alma non é unha realidade sensible e, polo tanto, non pode ser estudada pola ciencia. Teno claro.

ALMA sabe que a danza é abstracta, por iso, sempre que hai un oco entre movemento e movemento métese dentro, baila sen control, deixa saír a tolemia, expóñense sen medo á mirada de todos. Di que se non se fai así teríase perdido para sempre o lume que habitan as cousas. ALMA é un proxecto de Danza e Voo #vertical que comeza a a súa investigación internándose na poética que se pode xerar ao estudar e comprender a fisicalidade dun obxecto aparentemente moi sinxelo: Unha corda que colga do ceo dun teatro.

ALMA (non é hippie), é o primeiro espectáculo de Danza Vertical de Galicia, unha produción do Colectivo Verticalia, ou o que é o mesmo, das compañías Duelirium e Traspediante, co apoio de Pistacatro. ALMA (non é hippie) investiga nas diferentes percepcións sobre unha mesma realidade, os diferentes puntos de vista e, polo tanto, sobre o aparente e as aparencias desde a linguaxe da danza contemporánea, a verticalidade e o movemento.

Unha proposta de danza vertical para comezar marzo voando e dar o pistoletazo de saída ás artistas e propostas convidadas da tempada de primavera e do programa TRCDanza deste ano.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos