PUBLICIDADE

O Teatro Municipal Sá de Miranda de Viana do Castelo acolle do 20 ao 22 de setembro o II Festival Transfronteirizo de Teatro Amador promovido pola PLATTA -que integran a Federación Galega de Teatro Amador, a Federación de Grupos Aficionados de Teatro de Castilla y León, o Teatro do Noroeste-Centro Dramático de Viana/Teia e a erregueté. Esta nova edición do festival propón un programa intenso no que a creación se combina coa formación e a reflexión co obxecto de contribuír ao intercambio entre amantes do teatro do norte de Portugal, Galicia e Castilla y León.

O programa do evento comeza o venres 20 de setembro ás 21:30, na Sala Principal do Teatro Sá de Miranda, da man dos galegos Porta Aberta con Get Back. Escrita por Diego Ameixeiras, a peza trasládase a un día de rutina no metro de Londres do século XXI con cinco personaxes totalmente diferentes pero con un lugar común.

O sábado 21 de setembro, a programación continúa con Meditaciones para una emergencia, do grupo castelán Cachivache. Baixo a dirección de Javi Velasco e con texto do propio grupo, a peza embárcase nunha viaxe a través das “frustracións, odios, envexas, rancores, egoísmos, amores, inimizades ou todo o contrario, que poden ser o resultado dunha amizade verdadeira e profunda”.

Pola súa parte, o domingo 22 de setembro ás 16:00, o grupo portugués Teatro do Vez será o encargado de pechar o programa de exhibición con Os 10 cobrimentos. Sílvia Barbosa é a directora da peza que retrata os descubrimentos portugueses de forma “des(construtiva) e na que o seu autor, Mário da Costa, “brinca com seriedade, faz a teatralização histórica da História ao Vivo, da sátira social, do humor constante, muitas vezes brutal, desajeitado, corrosivo, mas lucidamente construtivo”.

 

I Premio Platta de Teatro Breve

O domingo 22 de setembro ás 12:00, terá lugar a presentación do texto gañador do I Premio Platta de Teatro Breve – Portugal, que nesta ocasión foi para a peza A importância de se chamar António, de Xacobe García. A peza, editada xunto coas súas traducións ao galego e ao portugués na colección Cadernos Platta, que edita a erregueté cofinanciada pola Agrupación Europea de Cooperación Territorial Galicia-Norte de Portugal, poderá verse en escena da man das 15 persoas participantes nos obradoiros de lecturas dramatizadas en tres linguas que se desenvolven durante o festival.

Dentro da súa actividade, coa intención de ofrecer un espazo para a reflexión sobre as artes escénicas e abrir novas perspectivas desde o teatro amador, a directora e docente portuguesa Luísa Pinto será a encargada de ofrecer unha nova entrega dos coloquios que neste 2019 se dedican ao tema “Teatro e inclusión”. O encontro terá lugar o domingo 22 de setembro ás 15:00 no Salón Nobre do teatro vianense.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos