A canguesa Rosa E. Gantes acada o II Prémio Platta de Peças Curtas de Teatro – Portugal 2020 coa obra Reencontro. O texto será publicado na colección PLATTA en galego, castelán e portugués, dentro das actividades da Plataforma Transfronteiriza de Teatro Amador.

 

O xurado – formado pola actriz Josefa Barreiro, o dramaturgo Ricardo Correia e o gañador do certame en 2019, Xacobe Otero e no que actuou con voz pero sen voto como secretaria Vanesa Martínez- destacou a “situación farsesca proposta con reminiscencias chekhovianas que ofrece un xiro final inesperado así como o bo desenvolvemento da historia e a súa potencia plástica de cara á escenificación debido ao diálogo que establece co mundo da pintura”.

A obra será levada á escena nos obradoiros de lecturas dramatizada en tres linguas dentro do programa de actividades do Festival Transfronteiriço de Teatro Amador organizado polo Teatro do Noroeste – Centro Dramático de Viana que terá lugar no Teatro Sá de Miranda de Viana do Castelo os días 25-26 e 27 de setembro. A peza será ademais publicada en portugués, galego e castelán pola erregueté dentro da colección Platta.

 

A autora

Rosa E. Gantes nace en São Paulo (Brasil). Afincada na Galiza desde 1970, actualmente mora en Cangas do Morrazo. O seu interese polo teatro lévaa a asistir a cursos impartidos por Manuel Lourenzo, Augusto Fernandes, Antonio Malonda, Jesús Aladrén , Leonel García, Jiris Jaros, Peralta del Amo, Johannes Vardar, Giuliano Tierno,Vanesa Sotelo, Casilda Alfaro, Pepa Barreiro entre outras.

Como mestra de educación infantil e primaria, asiste tamén a cursos ligados á Dramatización organizados por Movementos de Renovación Pedagóxicos , entre os que podemos sinalar os de Carlos Fragateiro e Franco Passatore. Dentro da súa faceta como formadora, Gantes impartiu tamén obradoiros de monifates para educadores e asociacións en diferentes Xornadas de Ensino e Encontros Pedagóxicos.

A súa relación co o teatro amador arranca na década dos 80 dirixindo o Grupo de Teatro Xuvenil de Arbo co que presenta o Entremés famoso sobre a pesca do río Miño. Desde entón ten dinamizado grupos de teatro amadores tanto infantís como xuvenís e de adultos ligados a asociacións de veciños e culturais, sendo o de mais longo percorrido o traballo con o grupo de Teatro Simalveira da aldea de Meiro en Bueu.

En 1986 funda e dirixe o grupo de Monifates, Música, e Animación “Faba na Ola”, sendo autora de varias das obras. Até 1992 o grupo actuou por toda a Galiza e fixo varias actuacións en Portugal e Brasil.

En 1992 publica na Ed. Ir Indo, en co autoría con Xosé M. Seoane e Tatán do grupo Tanxarina, o libro Como facermos títeres, sombras, carautas e cabezudos.

Na actualidade forma parte do grupo de teatro amador Eu.Experimento ligado ao Camões – Centro Cultural Português em Vigo e do grupo de posta en escena da Escola Municipal de Artes Escénicas de Cangas.

 

O certame
O Premio Platta de Teatro Breve en tres linguas nace en 2019 co obxectivo de estimular a escrita teatral e promover tanto a súa tradución como a súa difusión nos diferentes territorios que configuran a PLATTA, Plataforma Transfronteiriza de Teatro Amador (Federación Galega de Teatro Afeccionado, Federación de Grupos Aficionados de Teatro de Castilla y León, Teatro do Noroeste – Centro Dramático de Viana e a erregueté). O premio estrutúrase ao longo do ano en tres certames que se corresponden coa lingua do territorio que acolle cada un dos festivais transfronteirizos: Premio PLATTA de Teatro Breve – Castilla y León (castelán), Premio PLATTA DE Teatro Breve –Galicia (galego), Prémio PLATTA de Peças Curtas de Teatro – Portugal (portugués). Reencontro é o quinto título da colección PLATTA de teatro breve editada pola erregueté e que contou na súa primeira edición co financiamento da Agrupación Europea de Cooperación Territorial Galicia – Norte de Portugal. Completan a colección:

  • Amor de corbata, de Antonio Mauriz.
  • Morreu a tía María, de Xosé Prada.
  • A importância de se chamar António, de Xacobe García.
  • Voces en el limbo, de José Domínguez Bueno.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos