Teatro Gorrilla volve cunha edición especial para rematar o ano centrada na danza. A programación inclúe tres pezas para tres espazos alternativos e non convencionais como son A Morada, A Casa de Arriba e a Sala Kominsky en Vigo.
Será o 17 de decembro cunha xornada que se iniciará ás 17.00h en A Morada coa creadora de danza e movemento Amparo Martínez e a súa peza “Retake”, proposta que ven do pasado, mais está tan presente e viva coma entón.
Tamén haberá un mercado de nadal que organizan dende o espazo A Morada, con postos de todo tipo para ir pasar o día entre artesanías, obradoiros e espectáculos.
Na Casa de Arriba ás 20.00h, Vanessa Lozano compartirá co público a súa peza “No sé dónde encontrarme”, un solo de danza desta bailarina venezolana, que remove o seu adentro para sacar fora.
O remate desta edición danza será na Kominsky ás 21.00h co duo de Marcia Vázquez e Martín de Los Arcos, chamado “Bipedestrucción”, unha proposta escénica na súa primeira fase de investigación/creación. Cunha forte aposta pola improvisación, ambos traballan sobre forma e deformación continua do corpo. O dúo transita continuamente por diversas identidades rompendo formas impostas ou adquiridas.
A democratización das artes escénicas
Teatro Gorrilla é un proxecto autoxestionado e alternativo impulsado por Sergio Llauguer, Laura Merchán e Eva Comesaña e que pretende transformar e democratizar a cultura na cidade olívica, levando propostas contemporáneas de artes escénicas aos bares, lugares cheos de vida que apoian o arte a través de múltiples concertos, por iso, queren que as artes escénicas tamén teñan presenza nestes espazos non convencionais, e así, visibilizar novas propostas de artistas independentes en Galicia.
Teatro Gorrilla comeza como resposta á baixa visibilidade das artes escénicas e a escaseza de espazos para a sua práctica e desfrute na cidade de Vigo. O funcionamento de taquilla inversa, é a de aportar polo espectáculo unha vez sexa disfrutado e así valorar canto queres pagar por él, sendo o mínimo recomendado de 3€. Isto está inspirado no teatro de rúa onde se pasa a gorra.
