in ,

O proxecto Phōnē anuncia máis de 170 accións vinculadas coas artes escénicas

Lidérao a Xunta, con nove socios internacionais, para promover a diversidade cultural e lingüística de Europa a través do teatro

'A barca do Inferno', de Nauta Teatro
'A barca do Inferno', de Nauta Teatro

O secretario xeral de Política Lingüística, Valentín García, e o director do Centro Dramático Galego (CDG), Fran Núñez, presentaron esta semana Phōnē, o proxecto que a Xunta lidera xunto a nove socios internacionais “co obxectivo de contribuír á salvagarda da diversidade cultural e lingüística en Europa conectando as persoas a través do teatro”.

O proxecto, no que a Consellería de Cultura, Educación, FP e Universidades participa de xeito transversal a través dos seus departamentos de Política Lingüística, Cultura e Industrias Culturais, con especial protagonismo do CDG, supón a primeira gran colaboración internacional de teatros públicos e privados traballando polas linguas minorizadas e, cun horizonte en 2024, prevé obter como resultado máis de 170 accións culturais vencelladas ao mundo teatral.

Proxección exterior do teatro galego

No acto de presentación, que acolleu o Museo do Pobo Galego, tamén participaron a presidenta do dito museo, Concha Losada; a representante da Federación Galega de Teatro Afeccionado FEGATEA, Chelo Pampillón, e algúns dos artistas participantes neste proxecto, como Tamara Canosa ou Rafael Rey. Ademais, a xornada estivo amenizada pola actuación musical do compositor Xosé Lois Romero.

Publicidade

O responsable de Política Lingüística destacou a importancia de programas como este “en que a lingua galega se internacionaliza en espazos europeos onde hai sensibilidades por linguas coma a nosa”, e considerou un elemento clave “contar cun centro teatral de referencia que nos permite proxectarnos e intercambiar coñecemento con tan prestixiosas entidades”.

Pola súa banda, Fran Núñez incidiu na “importancia da lingua como eixe vertebrador da nosa cultura” e no “Centro Dramático Galego como unha ferramenta fundamental ao servizo da internacionalización do noso teatro”.

Publicidade

Con esta colaboración internacional, enmarcada na estratexia da Xunta dirixida a promover a cultura e lingua galegas no exterior, preténdense crear máis de 170 accións culturais de distinta índole tales como 16 producións teatrais, 16 coproducións de lecturas dramatizadas con elenco bilingüe, oito festivais e eventos internacionais, unha coprodución multilingüe baseada no traballo dos oito grupos comunitarios, oito residencias de creación dramatúrxica, 60 podcasts a partir dos obradoiros de escrita nos grupos de teatro comunitarios, 70 vodcasts realizados polos participantes no proxecto e unha publicación que recolla metodoloxías e boas prácticas para a difusión mediante o teatro de linguas minorizadas como base para crear unha rede de teatros.

Idiomas implicados

Para sacar adiante o proxecto Phōnē, a Xunta está a traballar man a man xunto a nove socios internacionais. Dunha banda, as compañías teatrais Fryske Toaniel Stifting Tryater (Países Baixos), Deutsch-Sorbisches Volkstheater Bautzen (Alemaña), Teatrul Evreiesc de Stat (Rumanía), Stadttheater (Italia), Fibin Teo (Irlanda), Teatr piba (Bretaña / Francia) e Itu teatteriforeeninki (Noruega). Ademais, tamén participan as institucións académicas Universität Leipzig (Alemaña), que conta cun departamento de estudos sobre minorías lingüísticas na sociedade, e a Stichting Hanzehogeschool Groningen (Países Baixos). Deste xeito estarán representados xunto co galego o frisón, o alto e o baixo sorobio, o yiddish, o ladino, o gaélico, o bretón e o kven.

O proxecto, que xa está en fase de desenvolvemento tras arrancar o pasado mes de xuño, prevé de cara a 2023 un encontro interxeracional en Irlanda para abordar o proceso de creación de teatro comunitario, un encontro de profesionais sobre as linguas en Alemaña e, finalmente, un encontro dos equipos de dirección, que acollerá Galicia.

Xa para o 2024, Italia será sede dun encontro de grupos amadores e, co gallo do 40 aniversario do Salón Teatro de Santiago de Compostela, a Xunta traballa nunha acción especial no marco deste proxecto.

Publicidade
Publicidade
Redacción

Redacción

Somos a erregueté | Revista Galega de Teatro.
A única publicación periódica que ten como obxecto as artes escénicas galegas dende 1983.

Deixa unha resposta

Avatar

O teu enderezo electrónico non se publicará Os campos obrigatorios están marcados con *

GIPHY App Key not set. Please check settings

    'Hotel Paraíso' de SillySeason, no Teatro Diogo Bernardes de Ponte de Lima. Foto de Vítor Ferreira.

    Hotel Paraíso

    Certame microteatro da memoria |

    A Deputación de Pontevedra e a ESAD de Galicia convocan o III Certame de Microteatro da Memoria