O Pazo da Cultura de Carballo será o escenario, un ano máis, das xornadas profesionais de Escena Galega. A súa nova edición desenvolverase o vindeiro martes 22 de outubro dentro do marco do FIOT de Carballo, baixo o título As artes escénicas profesionais e os públicos: do concepto de espectador ao de comunidade arredor da escena.
Estas xornadas, organizadas por Escena Galega, a Asociación Galega de Empresas de Artes Escénicas, dende hai quince anos, son un punto de encontro anual que se converteu nun foro estable de debate, reflexión e traballo sectorial para as artes escénicas profesionais en Galicia. Esta edición, conta, como nos anos anteriores, co financiamento da Deputación da Coruña e co apoio do FIOT de Carballo, que está a celebrar a súa 33ª edición.
Os eixes temáticos das xornadas xirarán arredor das relacións entre a escena galega profesional e o mundo educativo, dos públicos e os non públicos e como achegarse a eles e elas, das relacións ente a escena amadora e a profesional; de facer teatro (e danza e circo e maxia) e ver teatro (e danza e circo e maxia); dos programas de mediación como parte indispensable das programacións
escénicas, para ir alén do público espectador; da oferta escénica máis alá das cidades e vilas, para a poboación do medio rural; e dos retos inmediatos na comunicación cultural centrada no sector das artes escénicas.
Inscrición gratuíta
A actividade está aberta a calquera persoa relacionada ou interesada nas artes escénicas profesionais en Galicia, ben de xeito profesional ou amador, ou en calquera dos temas que se van tratar. A asistencia é gratuíta pero require inscrición previa, que debe realizarse nesta ligazón ata o luns 21 de outubro ás 14.00 horas.
O horario de desenvolvemento da actividade é de 9.30 a 18.30 horas, cunha pausa a media mañá e outra á hora do xantar. A inscrición inclúe a pausa-café e o xantar compartido e o formato das mesas de debate pretende ser participativo, con quenda de intervencións do público asistente en cada unha delas.
Programa completo das Xornadas profesionais de Escena Galega
