O Auditorio de Vimianzo acolle hoxe, 22 de febreiro, a estrea de Sol Fuerza, da compañía aAntena. Trátase dunha comedia contemporánea “que combina retranca, historia e crítica social cunha fonda conexión coa identidade galega”. Tres historias cruzadas levan o público nunha viaxe que abarca dende os anos 50 ata a actualidade, co toxo como símbolo central dunha Galicia que loita por non perderse entre promesas e progreso, nun espectáculo que mestura humor e reflexión.
Sinopse
“Nos anos 90, Heliodoro Vicente soñaba cun futuro radiante: Galicia iluminada grazas ao Sol Fuerza. Un invento prometedor que pretendía substituír o petróleo pola enerxía do sol. Pero xa sabemos como é a sorte en Galicia: cando non chove, o toxo prende lume, e o soño de Heliodoro apagou antes de brillar.
Pero esta historia non comeza aí. Xa nos anos 50, un tal Filek, máis listo que fame, paseaba por España vendendo auga de río coma se fose ouro negro. Chegou mesmo a enganar a Franco, todo un logro histórico, mentres as aldeas seguían esperando un milagre que nunca chegou.
E agora, no presente, entre muíños de vento, placas solares e promesas ecolóxicas, atopámonos cunha Galicia que dubida: progreso ou colonización? A historia se repite, as respostas complican, e nós quedamos preguntándonos: é isto o futuro ou unha boa mentira ben contada?”.
Equipo
Sol Fuerza conta cun elenco formado por Lucía Veiga, Manu Fernández e Virxinia Bermúdez. A montaxe está dirixida por Xosé Leis e conta coa dramaturxia de Bernardino Martínez. O espazo sonoro de Klaus Martínez, a escenografía de Violeta Martínez, o Vestiario de Noemi Toba (eNe de Toba) e os visuais de Montse Mira completan a posta en escena. Esta contou co apoio da Agadic, e coa colaboración do Concello de Vimianzo e a Sala Gurugú.
