O Día dos Namorados, 14 de febreiro de 2025, foi a “estrea mundial” de INFLUENCERS da Cía. NegroLópez (Iván Davila e Brais Iriarte), con dirección de Chiqui Pereira (Berrobambán) en Vigocultura, no Auditorio Municipal de Vigo.
Hoxe en día hai moito namorado das pantalliñas, xa sexa do teléfono, da tableta ou do computador. A atracción do mundo dixital, que usa a “filter bubble” (o algoritmo que filtra todo aquilo que nos gusta, illándonos nunha burbulla), cativa a calquera que se deixe e que non se decate. O mesmo pretenden facer as/os “influencers” dixitais, non estes do espectáculo da Cía. NegroLopez, que veñen inchar a burbulla para facela rebentar mentres escachamos de risa. A burbulla que fai que a vida a pé de rúa, esa que chamamos “vida real”, sempre vai ser menos atractiva e rechamante que a dixital.
Estes, os da Cía. NegroLópez, ofrécennos un show cómico, con estrutura e formato de concurso de televisión, en plan “talent show”: “Elo Máis Influencer Race Spain”, empregando un xogo de palabras referido ao magnate estadounidense Elon Musk, outro personaxe deses de armas tomar, e non vai ser o único, para abranguer a fauna dos máis variados e rimbombantes “influencers”: youtubers, tiktokers, instagramers etc. Polo escenario e pola pantalla que hai nel aparece a galería “freak” destes personaxes da esfera dixital, desde o “CriptoBro” coa carauta de Donald Trump, até a bruxa dixital que pretende enfeitizarnos cos seus “mantras” rocambolescos, pasando polo Youtuber que promociona unha vida sa, con exercicios de ximnasia e entoación de boa persoa. Trátase de clixés ou máscaras que representan as actitudes estereotipadas coas que esas persoas se transforman en personaxes mediáticos que intentan chamar a atención dunha audiencia crecente. O mundo da pose e da imaxe para atrapar nas súas redes canta máis xente mellor. Hai votación no concurso e hai “bulos” e negación da votación por parte de quen perde e, claro está, hai moitos gags, de tal xeito que todo resoa respecto ao que acontece na actualidade, tan influenciada polas maquinacións que se tecen e orquestran desde a esfera dixital.
A chave da comicidade deste espectáculo está na parodia da competitividade “influencer” e na habelencia circense da tríade formada por Brais Iriarte, Iván Davila e Elsa Comesaña para xogar con axilidade e bo ritmo diferentes tipos, en combinación cun dispositivo audiovisual no que pantallas e mundo virtual son fundamentais.
Rimos, pasámolo ben e até pensamos un pouco en cantas horas de vida real nos rouban os contidos dixitais, ou até que punto nos influencian, nós que somos público de teatro e amantes das artes vivas.
