O pasado venres 21 de marzo, a compañía de teatro e artes do movemento MORRAOCONTO, formada por Miguel Gendre, Rafa Martínez e Lara Pouso, debutou co seu primeiro traballo escénico: TROMSØ na Casa da Cultura do Milladoiro (Ames) coas entradas esgotadas.
Esta peza vén de recibir unha subvención da Agadic á nova creación no pasado ano 2024.
SINOPSE
TROMSØ é unha reflexión en clave de humor sobre a perda. Sobre a vida, a morte e todo o que queda entre medias. É un canto á tristura pero tamén á esperanza. Unha viaxe épica polos mares do norte, navegando tormentas, fiordes e enormes cardumes de arenque; coa esperanza de atopar respostas nun lugar onde as candorcas, co seu canto, desgarran o silencio salvaxe da aurora boreal.
A PEZA
TROMSØ é unha proposta multidisciplinar. A través dunha linguaxe reflexiva e poética presenta danza, texto, visuais e máscaras para contar unha historia que nace dun lugar moi persoal e diverxe nunha variedade de temáticas que atravesan a todas as persoas de maneira universal.
Tromsø é definida pola compañía como unha viaxe e unha transformación, o tránsito á vida adulta e o paso por ela. “É un punto de inflexión no que nos decatamos do efémero e do importante que é estar vivos e acompañados.”
A peza viaxa co espectador dende Galicia a Escandinavia, facendo paradas vitais en Bergen, Lofoten e Tromsø, que invitan á reflexión sobre temas tan diversos e relacionados entre si como o medio ambiente, a evolución persoal, a beleza da arte e o futuro que deixamos para os que veñen detrás.
FICHA ARTÍSTICA:
Dirección, texto e dramaturxia: Rafa Martinez
Dirección de coreográfica e de movemento: Esther Latorre
Elenco: Miguel Gendre, Lara Pouso, Lidia Veiga
Musica en directo: Julia Ammerman, Lucía Iglesias
Espazo escénico: MORRAOCONTO, José Faro “Coti”
Deseño de iluminación: José Faro “Coti”
Vestiario: MORRAOCONTO, Ana Gesto
Voz en off: Lidia Veiga
Animacións: Rafa Martínez
Máscaras: Rafa Rey
Deseño e imaxe gráfica: Rafa Martínez
Operador de Dron: Román Sanin
Agradecementos: Alfredo López (CEMMA Cetáceos), Ana Gesto, Roberto Salgueiro, Manu Lago, Paula Quintas, Edu Iglesias, Pilar Martínez, Sheyla Fariña.
Co apoio de Xunta de Galicia e Concello de Ames
Colaboran: Concello de Santiago, Compostela Cultura, Concello de Arzúa, Concello de Vimianzo, Deputación da Coruña, CEMMA Cetáceos.
PRÓXIMAS PARADAS
4 ABRIL: Santiago de Compostela: Teatro Principal
12 ABRIL: Vimianzo. Casa da Cultura
16 MAIO: Lugo: Auditorio Gustavo Freire
