Esta semana Vilagarcía de Arousa converteuse no escenario da gran festa da risa grazas ao Festaclown, que se desenvolveu entre o pasado luns 18 de agosto e onte, 23 de agosto e que contou cunha programación enchoupada de humor e compromiso.

Arrancou o luns co espectáculo Minotauro, de Nacho Flores, e a gala Circo contra a Barbarie, a favor de Palestina, e pechou onte á tarde coa Cía A Tope e a súa proposta de teatro físico e circo Shhhh! e co Mago Teto e o seu GaleRock ‘n’ Magic, un espectáculo que mestura maxia, humor e música galega en directo.

A gala Circo contra a Barbarie estivo organizada xunto á ONG Pallasos en Rebeldía, formada por unha rede internacional de grupos artísticos que promoven a solidariedade e a risa como motores de cambio social, e contou coa actuación de artistas como Mercedes Peón, Mago Teto, Kote Malabar, Marta Iglesias e Zirko Txosko.

Polo festival tamén pasaron a actriz e narradora Alba de Vales, con Contos arredor da terra; Assircopatas, con Rogelio 3 (La Fête), da man de Dani Blanco; Marta Alonso Tejada, con Dance Join; o pallaso Henriko, con Circo Cambuche; Rendos Pequeno, con Charlatán Rodríguez, protagonizado por Félix Rodríguez; a narradora Vero Rilo, que estreou Desnortadas; A Vela Circo, con Enredos; o mexicano Abraham Arzate con El Romperécords; Asaco Producciones con Ridi Pagliaccio; Pérez & Fernández e o seu espectáculo Rosa e Azul; A Cova das Letras con Chafallas, da man de Cristina Collazo; Circo Rojo, con Del Tingo al Tango; Ghazafellos, con Historias para escaghariñarse; Garrapete Clown e a súa proposta Crescendo, e La Finestra Nou Circ, con Tranvía nº12.

Ademais, o Festaclown acolleu tamén unha función de Animart, unha proposta dos colectivos Igualarte e Con Eles, e outra de Clownssics, unha creación colaborativa entre Con Eles, Clámide Teatro e Artefeito Producións, baixo a dirección de Fran Rei.

O festival está organizado por Culturactiva, coa colaboración de Pallasos en Rebeldía, e contou co patrocinio do Concello de Vilagarcía de Arousa e a colaboración da Xunta de Galicia e do INAEM.