A compañía de artes vivas Constance Hurlé presenta a súa nova produción de pequeno formato, titulada Miña pequena. A estrea deste espectáculo de danza-teatro para espazo non convencional terá lugar no Museo de Arte Contemporánea, MARCO, de Vigo, hoxe, 21 de novembro, ás 19:00 horas, a estrea, dentro da programación do 25N da Concellería de Igualdade do Concello de Vigo.
A peza é unha adaptación do relato Manaus, da propia Constance Hurlé, que foi gañador do 1º Premio de microrrelatos contra a violencia de xénero do Concello de Ribadavia no ano 2020. Nela explóranse, dende a poesía, a danza e o son, “as conexións entre psique, corpo e violencia”. O eixo é a narración dunha violación, cuxa lembranza quedará pechada nos recunchos da memoria da vítima. A actriz adentrará o público nunha íntima confesión onde quedarán expostas a crueza do abuso e a fraxilidade do corpo aldraxado a través da metáfora e a honestidade do relato directo, en segunda persoa, dirixido ao agresor.
O traballo quere convidar “á reflexión sobre a cotiandade da violencia de xénero e o abuso sexual no ámbito íntimo da parella e como estas violencias deixan unha pegada no corpo, transformándoo e atravesándoo”.
En escena estará a intérprete, Constance Hurlé, acompañada pola composición sonora en directo de Diana Longa. O equipo nesta produción está conformado Constance, como autora do texto e intérprete, así como directora da propia compañía e da produtora e distribuidora Hurlé prods, pequena empresa creada para soster distintos proxectos de artes escénicas e musicais da propia directora e artistas locais; por Diana Longa, que se estrea como profesional do sector con esta mesma peza, e quen, ademais do espazo sonoro, asume tamén a dirección e a dramaturxia; e coa bailarina Olga Cameselle, colaboradora habitual da compañía, na asesoría no movemento. Na área de creación de contido audiovisual (fotografía e vídeo) atópase Xandra Táboas, Gravidade 0.0. Outras persoas que apoiaron a peza durante o seu proceso creativo son Fran Sieira e David Jácome, aos que a compañía quere “agradecer profundamente a súa colaboración totalmente desinteresada”, así como a Paula Cabaleiro e á área de Igualdade do Concello de Vigo “pola súa confianza”.
Constance Hurlé é unha compañía viguesa que traballa con linguaxes híbridas de carácter contemporáneo dentro das artes do movemento. Comezou a súa traxectoria profesional cando no 2021 recibiu unha axuda á creación da Agadic coa que estreou seu primeiro espectáculo de gran formato, Lara Hierro. A partir dese momento, comezou a facerse un nome dentro do sector cultural galego, destacando as súas creacións de pequeno formato, “coas que veñen traballando desde os inicios, na periferia máis underground”, segundo salientan dende a compañía.
A única publicación periódica que ten como obxecto as artes escénicas galegas dende 1983.
