Tras case seis meses da estrea de Arar en Vigo e unha xira, a compañía Ensalle regresa esta fin de semana á casa, o Teatro Ensalle, onde volverá a compartir co público a súa última creación. As funcións serán o venres 15 e o sábado 16 ás 22:00 e o domingo 17 ás 21:00.
O traballo, enmárcase no contexto de Canchales; unha iniciativa para a investigación escénica iniciada en 2016 pola compañía, a partir da cal invitan a creadores da escena contemporánea a participar nos procesos de creación, posibilitando experimentar camiños comúns e afondar en ideas desde distintas perspectivas.
No proceso de Arar, a compañía traballou co actor Juan Loriente e o escritor, editor e director de escena Antonio Fernández Lera en dous momentos ou fases distintas do proceso.
As compañías El canto de la cabra, Cambaleo Teatro e a bailarina e coreógrafa Mónica Valenciano (Premio Nacional de Danza 2012 na modalidade de Coreografía), son outros dos artistas que participaron do proxecto Canchales nos procesos das dúas montaxes anteriores á que se poderá ver esta fin de semana no Teatro Ensalle.
Sinopse
“A idea es precipitar o que non se di, o que non se fai. O tránsito, o camiño, a precipitación coa súa velocidade e o seu ruído e a súa desorde, a elección dos obxectos deitado polo tubo, a escena cambiante.”
Ficha
Elenco: Raquel Hernández, Artús Rei e Pedro Fresneda
Dirección e texto orixinal: Pedro Fresneda
Proceso compartido con: Juan Loriente (Canchales IV) e Antonio Fernández Lera / Margrinyana (Canchales V)
Iluminación e Espazo Sonoro: Pedro Fresneda
Fotografía: Bieto Rei, Elena Vázquez, María Costa
Texto editado por Colección Pliegos de Teatro y Danza, AFLERA. Nº66
Unha peza creada a partir do texto Arar de Pedro Fresneda e as colaboracións artísticas con Juan Loriente en Canchales. Parte IV. (Juan) e con Antonio Fernández Lera e Magrinyana en Canchal. Parte V (Antonio F. Lera y Magrinyana).
