in

Pecha o Museo da Marioneta de Lalín

MuseoGalegoMarioneta
Un comunicado a través das redes anunciaba onte a fin dun proxecto que non conseguiu cobertura legal para consolidarse, malia a vontade das partes por institucionalizar o Museo.
| Manuel Xestoso |

 

Tras dezaoito anos de actividade, o Museo da Marioneta de Lalín anunciou onte o seu peche. A exposición “Marionetas do mundo. Un mundo de marionetas” na Sala de Exposicións do Multiúsos da Xunqueira, dentro do Festival de de Redondela, serve como epitafio a máis de dezaoito anos de actividade nos que as institucións non foron quen de dar resposta á necesidade de consolidar un proxecto que convertía a capital do Deza nun referente do teatro de monicreques.

Un comunicado a traves das redes sociais anunciaba onte a fin do proxecto: “O foi unha entidade que tivo como obxectivo recuperar, mostrar e fomentar o goce, a investigación e o estudo da arte das marionetas para construír unha obra colectiva. Un obxectivo que non se logra sen o fenómeno da transmisión. A exposición de parte dos seus fondos no XX FIT Redondela, ao que convidamos a asistir, pon fin ó proxecto”, rezaba o texto.

PUBLICIDADE

En conversa coa erregueté, Anxo García Fernández –de Viravolta Títeres, verdadeiros artífices do proxecto– declaraba que a decisión era “extremadamente difícil” de tomar, pero que a loita legal por conseguir unha certa estabilidade estaba afectando á actividade da compañía sen que houbese visos de conseguir a ansiada axuda para a consolidación do Museo como tal.

“Cónstanos a boa vontade do Concello, pero existe un labirinto legal que non permite atopar unha fórmula que satisfaga as esixencias dunha lei pensada para grandes empresas”. A falta de axudas abocou ao Museo a permanecer sen actividade, sen persoal que o atendese e sen un encargado que xestionase unha biblioteca que contaba con máis de catro mil entradas. “Mesmo se propuxo un concurso público para a xestión do museo, pero nunca chegou a realizarse”, indica.

O Museo xa permanecera pechado de 2010 a 2014 polos mesmos motivos, e reabrira en Liñares baixo a promesa dunha solución rápida. Non obstante, a comisión de seguimento do proxecto só se reuniu unha vez nestes catro anos e, malia que se abordou como se puido o traballo de catalogación de fondos, as xestións nunca chegaron a un bo fin: “nunca se deu o paso definitivo que permitise darlle unha entidade institucional”.

PUBLICIDADE

Dende Viravolta insístese no paradoxo de que un proxecto voluntarista que parte do asociacionismo e que beneficia á sociedade non conte cun apoio institucional e que teña que se enfrontar cunha lexislación que non só non facilita que este tipo de ideas saia adiante, senón que pon todo tipo de trabas para a súa realización. “Nin sequera se puideron doar os fondos ao pobo de Lalín por falta de cobertura legal”.

Agora, di García Fernandez, os fondos que pertencen a VIravolta serán empaquetados “nas mellores condicións posibles”, igual que os libros, catálogos, revistas e outros ítems pertencentes á biblioteca, “pero sen posibilidade de que sexan vistos nin consultados”. A outra parte dos fondos, cedidos por diferentes entidades, terán diferentes destinos segundo a decisión que tomen os propietarios despois de ser consultados.

O comunicado de Viravolta remata con ” a nosa eterna gratitude e agarimo a todas e todos os que fixeron posible  – mentres durou-  un proxecto tan fermoso e ilusionante”.

 

PUBLICIDADE
PUBLICIDADE
Redacción

Redacción

Somos a erregueté | Revista Galega de Teatro.
A única publicación periódica que ten como obxecto as artes escénicas galegas dende 1983.

Deixa unha resposta

Avatar

O teu enderezo electrónico non se publicará

GIPHY App Key not set. Please check settings

    Colonia

    Dúas obras do FITEI en Viana do Castelo

    Xavier Lama

    Xavier Lama recibe este xoves en Brión o I Premio Laudamuco