Elisa e Marcela, a montaxe da compañía A Panadaría, vén de recibir o Premio Las Horas do Festival Internacional de Cine LGBT de Extremadura. A gala de entrega dos premios será este sábado 16 ás 22:00 no Palacio de Congresos Manuel Rojas de Badajoz. Gena Baamonde, directora do espectáculo, recollerá o premio.
Elisa e Marcela é unha comedia musical que aborda a historia da voda entre dúas mestras que tivo lugar na Coruña en 1901, o primeiro casamento homosexual do que se ten constancia no Estado español.
Coproducido xunto ao Centro Dramático Galego e os concellos da Coruña, Vimianzo e Rianxo, este espectáculo arredor da historia de amor de dúas mulleres a principios do século pasado, xa recibiu un bo número de premios aos que agora se suma este; entre eles, os Premios María Casares a Mellor Espectáculo, Mellor Dirección (Gena Baamonde), Mellor Actriz Protagonista (Areta Bolado) e Mellor Texto Orixinal (Areta Bolado, Ailén Kendelman, Noelia Castro e Gena Baamonde); o Premio do Público da MIT Ribadavia, ou o Premio ao Mellor espectáculo do FETEGA do Carballiño.
