Actualidade

PUBLICIDADE

A compañía Cámara Negra estrea a versión teatral de Si esto es un hombre de Primo Levi, unha obra fundamental sobre os campos de concentración e o comportamento do ser humano. A estrea terá lugar o vindeiro 24 de xaneiro na Sala Ártika de Vigo coincidindo co 75 aniversario da liberación de Auschwitz.

| Foto: Álvaro Rodríguez Galán |

 

Trátase dun monólogo teatral protagonizado por Carlos Álvarez-Ossorio, quen asina tamén a versión e a dirección. Completan o equipo: Juan José Villanueva como dramaturxista e asesor de actuación, Alfonso Hierro-Delgado como asesor de alemán e corpo e Violeta Martínez no deseño de iluminación.

O proxecto que Álvarez-Ossorio comezou hai unha década presentouse o pasado 24 de outubro na Facultade de Filoloxía da UCM (Universidad Complutense de Madrid) no marco do Congreso Internacional Primo Levi (1919-2019): Memoria y Escritura, e é para el unha obra fundamental para comprender ao ser humano, tal e como Levi expón no título.

Dende que en 2008, Carlos Álvarez-Ossorio lera o texto de Primo Levi comezou a traballar nunha posible adaptación escénica. Tras dez anos de xestións para conseguir os dereitos de autor, en 2018 comezou o proceso de produción, dramaturxia e ensaios.

Para Cámara Negra, a consideración de Levi de que aprender de Auschwitz é preciso para ser humanos, segue sendo, hoxe máis ca nunca, profundamente necesario e vixente . “A súa testemuña ofrécenos unha chamada de atención, un sinistro sinal de perigo que lle devolva ao horror a súa realidade e que converte este texto nunha incitación a reflexionar sobre a realidade que atravesamos hoxe os europeos do século XXI “, afirma Carlos Álvarez-Ossorio.

Na proposta escénica, un actor enfróntase ao texto de Levi nun teatro aberto e baleiro. A través da súa lectura, tentará entender e comprender que foi Auschwitz, que supuxo para entender os límites da humanidade. Para poder entender as palabras, terá que encarnalas, levalas ao seu corpo e á súa alma, nun exercicio de honestidade e nudez absolutas. Pero nesta busca tamén se atopará cunha dificultade fundamental: Como pode o actor, que vive no mesmo mundo que os espectadores, que actúa no mesmo espazo que habitan eles, convencelos de que está preseo nun campo de concentración, ou mesmo que é un supervivente deses días? “Non se pode representar Auschwitz en escena. Trátase de encarnar, dende o presente, as cuestións que Primo Levi expón, e que sexa o espectador o que reconstrúa na súa mente aquela realidade”.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

PUBLICIDADE

Relacionado

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos