O FETEGA, Festival do Teatro Galego “Celso Parada” do Carballiño, vén de facer públicos os resultados da convocatoria para participar na súa 32ª edición, que se celebrará a segunda semana de setembro. Presentáronse un total de 141 pezas candidatas, fronte ás 104 do ano pasado, o que supón un 40 por cento máis que a edición anterior.
Todas as obras presentadas desenvólvense en galego e están producidas en Galicia. Delas, destaca a variedade de xéneros, estilos e temáticas, e 16 son estreas. En total, foron 51 os espectáculos presentados na categoría de sala para adultos (un 36 por cento), 21 os espectáculos de sala para nenas e nenos, 23 os espectáculos de rúa, 12 os de teatro para exterior en anfiteatro, 26 as performances e 8 os monólogos cómicos. Entre todos eles realizarase a programación definitiva. É a segunda vez que se fai deste xeito, a través dun formulario online, dende a páxina web do festival.
