A Mostra de Teatro de Ribeira acolle a estrea do espectáculo Do reino (e) dos amores proscritos de ALÓproducións (Alberte Bello), este xoves 16 de outubro de 2025 ás 21h15 no Auditorio Municipal de Ribeira.
O espectáculo, con dramaturxia e dirección de Afonso Becerra de Becerreá, recibiu un premio no III Certame Fondo de Proxectos Culturais Reino de Galicia do Servizo de Acción Social, Cultura e Deportes da Deputación da Coruña. Ademais, contou coa colaboración das áreas de cultura do Concello de Lugo e da Deputación de Lugo, cidade esta última na que se realizaron os ensaios ao final do verán.
Na sinopse do espectáculo sinálase:
“Xoguete teatral “vintage” contemporáneo, que propón unha viaxe ao Reino de Galiza, na Idade Media, desde os primeiros asentamentos humanos, a lenda celta, dos castros aos castelos, coa Gallaecia romana polo medio. Unha viaxe lúdica e festiva, desde a perspectiva de artistas (trobadores, xograres, soldadeiras), mulleres (raíñas) e vidas e historias LGBT. Un espectáculo contemporáneo para evocar aquela época, na que se encontran os fundamentos de boa parte da nosa cultura. Un reino e uns amores proscritos da historia oficial, durante moito tempo. Unha viaxe fascinante a través do xogo teatral e da música medieval, interpretada en directo con instrumentos de época e co tesouro das nosas cantigas.”
No escenario actúan Ana Carreira Varela, Isabel Risco, Alberte Bello e Henry Vidal. Este último ocúpase da música e de interpretar a Martín Códax, Xohán de Cangas e Mendiño. Pola súa banda, Alberte Bello, ademais de actuar tamén se ocupa da escenografía, da caracterización e da iluminación. O equipo complétase coas ilustracións de Paula Garrote e coa colaboración na produción, xunto a Bello, de Ana G. Fernández.
Para a dramaturxia Becerra contou con textos de creación propia, pero tamén con dous textos e dous poemas orixinais da escritora Rochi Nóvoa Vázquez para as escenas das raíñas Dona Sancha e Dona Urraca. Ademais das cantigas medievais, o espectáculo integra algúns versos de Pondal, de Novoneyra e de Darío Xohán Cabana e aséntase en múltiples fontes documentais, sendo unha das fundamentais o libro Vidas e historias LGBT na Idade Media de Carlos Callón, que aparece directamente no espectáculo.
Segundo o director de escena, trátase dun espectáculo “moi agradable e lúdico, entre a narración oral, con Ana Carreira como mestra de cerimonias, a instalación e o xogo con deseños recortables, como aquelas bonecas de cartón de antano, ou os debuxos animados, de factura moi artesanal. A partir do relato van xurdindo, evocadas máis ca representadas, as personaxes dos trobadores, as soldadeiras, as raíñas e dúas escenas de amor.”
Becerra tamén sinala: “Unha das delicias do espectáculo, ademais de recuperar a memoria ficcionada, viaxando ás orixes da cultura galega, son os números musicais cunha instrumentación e unha interpretación que nos leva á Idade Media. Eu tiña ganas de ir a un espectáculo onde puidese ver e ouvir aos trobadores que fixeron ese tesouro da lírica galego-portuguesa. Igual que tiña ganas de homenaxear á primeira profesional das artes escénicas galegas: María Balteira”
Os billetes para a función deste xoves poden encontrarse aquí.
A única publicación periódica que ten como obxecto as artes escénicas galegas dende 1983.
