Psicofonías de Marcos Abalde gañou o Premio do Xurado do XI Premio Diario Cultural de Teatro Radiofónico. Pola súa vez, o Premio do Público, outorgado polos votos dos ouvintes, foi para Alianzas de Avelina Pérez. As obras gañadoras levan candanseus 3.000 euros de premio.
O programa deu a coñecer onte os gañadores desta edición no que tamén figuraron como finalistas Proxecto Tempo de Clara Gayo e Andrómenas soa moi antigo de Fernando Epelde. Nesta edición, presentáronse 61 orixinais.
O xurado estivo constituído por Carmén Castro –programadora teatral do Concello de Carballo–, Antón Lopo –crítico teatral do Diario Cultural– e Santiago Cortegoso –dramaturgo e director das adaptacións radiofónicas desta edición.
Marcos Abalde xa obtivo ao longo da súa carreira outros premios como o Premio Josep Robrenyo 2008 por Canibalismo, o Premio Álvaro Cunqueiro 2011 por A cegueira (Xerais, 2012) ou o Marqués de Bradomín 2012 por Xudite. Avelina Pérez, pola súa parte, xa gañara, entre outros, o Premio do Público deste certame en 2015, con Non teño espello no baño. Actualmente ten en cartel a obra Os cans non comprenden a Kandinsky.
As catro obras finalistas serán editadas nun libro ao que acompañará un CD coa adaptación radiofónica dos textos . Será o undécimo volume da colección de Teatro Radiofónico, xa con máis de corenta obras publicadas.
