Actualidade

PUBLICIDADE

#camiños de ButacaZero, Arnoia, Arnoia de Pistacatro e Anarquismos de Pablo Fidalgo súmanse á xa estreada Elisa e Marcela de A Panadaría como coproducións da temporada 2017-2018

 

O Centro Dramático Galego (CDG), a unidade de produción teatral da Xunta de Galicia, presentou hoxe as actividades que asentan a súa temporada 2017-2018, coa estrea o 12 de abril da primeira versión en galego da obra de Valle-Inclán Divinas palabras, baixo a dirección de Xesús Ron, como fito principal do calendario.

Ademais, a colaboración coas compañías privadas segue a ser prioritaria a través de catro coproducións e dos programas Dramaturxente e En Residencia, así como do resto da carteleira de exhibición do Salón Teatro, a súa sede en Santiago de Compostela.

O CDG aposta por seguir incorporando os textos de Ramón María del Valle-Inclán ao repertorio teatral en galego, unha vez liberados os dereitos sobre a súa obra. A compañía pública afronta agora a posta en escena de Divinas palabras, unha das obras cumio do gran autor arousán, con dirección de Xesús Ron e con Patricia de Lorenzo e Manuel Cortés como protagonistas, encabezando un elenco do que tamén formarán parte outros sete intérpretes elixidos no proceso de selección que a compañía pública mantén aberto nestes momentos.

Respecto ao resto das propostas que se desenvolverán durante esta temporada, o CDG reforza o seu programa de coproducións con catro montaxes xunto a outras tantas compañías galegas: #camiños (ButacaZero), escrita por Esther F. Carrodeguas e dirixida Xavier Castiñeira; o espectáculo de circo Arnoia, Arnoia (Pistacatro), con dirección de Quico Cadaval a partir do texto de Xosé Luís Méndez Ferrín; a creación de Pablo Fidalgo Anarquismos, con implicación doutras entidades culturais da península; e a xa estreada Elisa e Marcela, de A Panadaría.

Na mesma liña de colaboración directa coa escena galega, a compañía pública avanza noutros dous programas claves. Dunha banda, ao abeiro de Dramaturxente –iniciativa para o apoio, fomento e promoción da dramaturxia galega contemporánea– porase en marcha o grupo de traballo DramaturXA, que será dirixido por Manuel Lourenzo e para o que se seleccionarán dez autores e autoras co fin de reflexionar sobre a identidade galega e de escribir cadansúa peza teatral. De entre todas elas, elixiranse tres para seren levadas a escena conxuntamente como nova produción propia do CDG.

Outras das novas propostas que botarán a andar na temporada dentro deste programa son Teatrhoxe –un apartado do web do CDG no que se publicará, cada tres meses, unha reflexión escénica ou pequena peza teatral sobre o tema de actualidade que cada autor/a escolla, xunto cunha breve biografía e imaxe do/a autor/a correspondente–; Lanzadeira –unha convocatoria pública na que se seleccionarán 10 autoras/es para facer unha breve presentación e unha lectura aberta ao público xeral dun fragmento dun dos seus textos–; e o Taller de Dramaturxia –un obradoiro orientado especificamente ás dramaturgas e dramaturgos galegos.

Doutra banda, En Residencia continúa ofrecéndolles o Salón Teatro e a asistencia técnica do equipo do CDG a diferentes compañías galegas para ultimar ou perfeccionar as súas propostas, incluíndo as catro realizadas en coprodución. Polo seu escenario pasaron xa desde setembro Feira do Leste, Javier Martín, Anómico Teatro e Inversa Teatro e nos próximos meses farano Voadora con Garaxe e A Feroz con Afterparty.

O público poderá gozar de todas elas dentro do programa de exhibición do Salón Teatro, que acollerá igualmente dous novos títulos do ciclo Teatro Ob-Sceno para propostas en pequeno formato que se desenvolven fóra do escenario (Amor, de Helen Bertels, e Deixa de tocala, Sam, de Avelina Pérez), e as últimas achegas de Os Monicreques de Kukas, CAIR Compañía de Circo, Aporía Escénica e Xarope Tulú.

A actividade formativa e a edición de Divinas palabras dentro da colección O papel do teatro completan esta programación.

 

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

PUBLICIDADE

Relacionado

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos