Os días 26, 27 e 28 de xaneiro Proxecto PANK presentan o concerto teatralizado Masa Madre + Sal Marina no Teatro Ensalle de Vigo. Masa Madre + Sal Marina é o título dunha canción que naceu do encontro entre a creadora galega Cristina Balboa e o mexicano Manuel Parra García.
Baseada na experiencia vital do teatro dos seus creadores, esta co-produción parte da vontade dos mesmos de colaborar nun proxecto escénico na que analizaban a súa carreira sobre ou detrás das táboas e confrontar aspectos que xa non lles gustaban do sistema produtivo teatral contemporáneo. A coincidencia persoal con dúas Compostelas –a galega e a mexicana– e o periplo cara ao teatro posdramático foron as premisas do proxecto co que obtuveron unha bolsa de Iberescena para crear a dramaturxia do espectáculo. Despois de varias residencias artísticas en Compostela e México, Proxecto PANK presenta en Vigo esta proposta que se revela contra a idea dunha teatralidade do sufrimento e do esforzo e que se adentra na relación entre os dous creadores e a música porque en realidade o que sempre quixeron ser é “estrelas do pank”.
Tal e como sinalan Balboa e Parra, Masa Madre + Sal Marina é un concerto con textos e inquedanzas no que se comparten referentes, “coas nosas letras e música, producindo co que temos a man, sen sufrir; buscando un espazo de disfrute nun contexto onde a idea de espectáculo xa non nos convence pero sen renunciar ao pracer de poñernos aí e realizar dalgunha forma os nosos soños”.
CRISTINA BALBOA
Artista escénica e videorrealizadora afincada en Compostela. Na súa traxectoria teatral destacan as colaboracións como intérprete en Cía D2 nos espectáculos Queremos Bailar e Las verdades duelen. Desde 2011 dirixe a Cía. Funboa Escénica, fundada en 2011 por Paulina Funes e Cristina Balboa e que conta cos traballos escénicos Oiseau Rebelle con Paulina Funes (2011), Sigue Buscando con Estevo Azañón (2013), Sushi Gratis con Lúa Gándara (2015) e a micropeza Anoter Espectacle. En 2015-16 realiza o Máster en Práctica Escénica y Cultura Visual da UCLM. Como videorealizadora, entre diferentes traballos para diversas compañías, leva desde 2010 vinculada ao festival de danza e artes do corpo “Corpo(a)terra” de Ourense realizando os vídeos promocionais e o arquivo fílmico do festival.
MANUEL PARRA GARCÍA
Diplomado en actuación pola Secretaría de Cultura de Jalisco (México) e en Produción e dirección escénica polo programa Práctica de Vuelo de Coordinación Nacional de Teatro e o Instituto Nacional de Bellas Artes no CENART de San Luis de Potosí. É co-fundador do grupo Inverso Teatro de Guadalajara no 2006, encargado de xestionar o espazo de creación Casa Inverso. O seu traballo como actor, director e dramaturgo, foi exposto en diferentes mostras, encontros e festivais internacionais. En 2016 conclúe o estudos do Máster de Práctica Escénica y Cultura Visual da UCLM.
