O Teatro Principal e a Sala Roberto Vidal Bolaño acubillarán a partir da vindeira semana a 19ª Mostra de Teatro Universitario de Galicia, unha cita de entrada libre que porá sobre as táboas nove representacións e que organiza a Aula de Teatro da USC co apoio da Deputación da Coruña.
A programación teatral comezará o martes 24 de abril no Teatro Principal da man da Compañía de Teatro USC-Lugo coa obra WK, unha dramaturxia de Paloma Lugilde a partir da obra Woyzeck de Georg Büchner. Está prevista unha función dobre con representacións ás 19.00 e ás 21.00 horas e aforo reducido. Ao día seguinte Tolemia Teatro (USC) representará Cyrano mentres que o sábado 28 e o domingo 29 Labarata (USC) representará na Sala Roberto Vidal Bolaño Al dente, peza de creación colectiva.
Xa o luns 30, de volta no Teatro Principal, a compañía Maricastaña do Campus de Ourense representa As ondas das pedras do río’, dramaturxia que asina Fernando Dacosta a partir da novela O deus das pequenas cousas de Arundhati Roy. Seguiranlle o martes 1 de maio ARTías (USC) escenificando Des-Armadas de Tomás Afán e Fernando Arrabal e o mércores 2 de maio Faísca (USC) con Historia natural das estrañas criaturas mariñas, de creación colectiva.
O xoves 3 de maio, novamente na Sala Roberto Vidal Bolaño, Lobishome (USC) sube ás táboas Insilio de Miguel Ponce e José G. Vera, mentres que o venres Polaroid (USC) achega a súa versión de Fahrenheit 451, nunha adaptación de Félix Álvarez a partir da obra orixinal de Ray Bradbury. A mostra botará o pano con dúas funcións, o sábado 5 e o domingo 6, de Vacaloura (USC) que interpretará Lendatarias de Amantía Coello.
Con excepción da xornada do día 24 de abril, as entradas poderán retirarse a partir das 20.00 horas na Sala Roberto Vidal Bolaño e dende as 18.00 horas no Teatro Principal.
