Hoxe arranca o Festival Internacional Outono de Teatro de Carballo (FIOT), e faino cunha celebración moi especial: a Rúa dos Contos, o ciclo máis irreverente do festival, cumpre 20 anos baixo o lema “Noites de Rúa Chea”. A Rúa dos Contos constitúe un referente en Galicia para os monologuistas, tanto para os que inician a súa traxectoria como para os que buscan a súa consagración.
A primeira actuación na Rúa dos Contos terá lugar na Cafetería Colón, prevista ás 10:00, con Avelino González e o seu espectáculo Contos de contrabando. Continuará a media noite, no Mesón do Pulpo, con Marcos Pereiro e o seu monólogo Cómo ser armario empotrado. A programación de Rúa dos Contos estenderase ao longo de toda a fin de semana.
Esta primeira fin de semana, concretamente o domingo, representarase no Pazo da Cultura un dos espectáculos máis esperados polo público: Somos criminais (20:30), con Carlos Blanco e Xosé A. Touriñán, dous cómicos que están a bater marcas de espectadores con esta proposta escénica: en Carballo as entradas esgotáronse en menos de dúas horas.
Igualdade, ocio e millennials
O FIOT27, que ofrece 41 espectáculos, xira en torno a tres eixos conceptuais: a igualdade, o ocio e a conexión cos mozos. O festival arranca mañá co grupo galego Pulpiño Viascón, que percorrerá as rúas de Carballo para anunciar o espectáculo de apertura, “La Musicleta”, un pasarrúas para todos os públicos (19:00).
Tamén mañá venres, o FIOT programa, ás 20:30, na Praza do Concello de Carballo, a actuación do grupo valenciano La Trócola Circ, que porá en escena o espectáculo para todos os públicos “Emportats” (en caso de que chova a representación realizarase no segundo piso do mercado municipal). A compañía presenta un espectáculo de acrobacias, malabares, música e humor.
