En Narón, Teatro do Noroeste estrea Da avaricia, a luxuria e a morte, de Valle Inclán –traducido por Manuel Guede– dirixida por Eduardo Alonso e con Luma Gómez, Manuela Varela, Fernando Tato, Imma António e Miguel Pernas. Trátase dun espectáculo con música en directo que se presentará no Pazo Da Cultura hoxe ás 20:30 e mañá ás 20:00.
De xeito inmenso, certeiro e maxistral, Valle-Inclán trenza nas tres obras que configuran este espectáculo os dous únicos motores que moven o mundo humano, a avaricia e a luxuria co seu inevitable tránsito final: a morte. Da singular e poética Ligazón (auto para siluetas), lívida como o vento, pasando pola espectral e contundente A rosa de papel (novela macabra), fraguada no lume, até a americana e patriótica A cabeza do Bautista (melodrama para marionetas), tallada en terra; todas elas expresadas nunha tradución que é reposición con aceno de canónica.
Aínda que pode parecer que os tres textos curtos que configuran este espectáculo, Ligazón, A rosa de papel e A cabeza do Bautista están relacionados con cadanseu pecado do título, a realidade é que os tres están, en forma e proporcións diferentes, empapados de avaricia, luxuria e morte. Non se pode dicir que algunha delas predomin nun texto ou noutro.
Teatro do Noroeste é unha compañía creada por Luma Gómez e Eduardo Alonso, profesionais cunha dilatada experiencia teatral, que acaba de festexar o seu 30 aniversario no 2017. En todos estes anos ten producido montaxes de textos clásicos como Medea de Eurípides, Rey Lear, Macbeth, Noite de reis ou Romeo e Xulieta de William Shakespeare; e de autores contemporáneos, básicamente galegos, como Unha Rosa é unha Rosa de Suso de Toro, A grande noite de Fiz de Miguel Anxo Murado, Campo Sur de Lino Braxe, ou o musical Glass City (Cidade de cristal) de Eduardo Alonso e tamén textos como Confesión ou Linda and Freddy, ilusionistas de Eduardo Alonso.
