A sede da Fundación SGAE en Santiago de Compostela anuncia a primeira edición de PULSO, un ciclo de encontros que pretende achegar a realidade dos procesos creativos ao público. Autores ben significados en diferentes ámbitos da cultura falarán sobre a súa experiencia, sobre o seu traballo e, en definitiva, sobre a súa vida. Un número íntimo de espectadores poderá asistir a estas sesións, que serán un espazo de diálogo e non unha serie de conferencias unidireccionais. Nesta primeira edición, o músico Iván Ferreiro, o dramaturgo Quico Cadaval e o cineasta Jorge Coira trasladarán á audiencia o seu propio pulso creativo, os resortes que os estimulan, as particularidades do seu oficio e o seu concepto artístico.
Quico Cadaval, dramaturgo e promotor do movemento de contacontos que xurdiu en Galicia nos anos noventa, autor, adaptador, director, actor e, en definitiva, home de teatro, estará o mércores 24 dentro deste ciclo. Cadaval é unha das figuras máis relevantes da historia do teatro galego contemporáneo. Comezou a súa carreira a finais dos anos setenta e, dende aquela non deixou de traballar en compañías como O Moucho Clerc (Un códice Clandestino, O rouxinol da Bretanha, DaVinci levaba razón…) ou co Centro Dramático Galego, para o que dirixiu pezas como O ano do cometa, Como en Irlanda, Noite de Reis ou A ópera de tres reás. Con Produción Teatrais Excéntricas, a compañía coa que traballa actualmente, dirixiu numerosos espectáculos de Mofa e Befa, ademais de obras como Obra (no comment), Un cranio furado, Oeste solitario ou A cabeza do dragón, o primeiro Valle representado en galego por unha compañía profesional. Premiado varias veces nos María Casares (O ano do cometa, Rapatú, Noite de Reis…), tamén traballou en varias producións para cine e televisión.
Ademais, PULSO comeza o día anterior, 23 de outubro, coa participación do autor e músico Iván Ferreiro, que iniciou a súa carreira como cantante e compositor con Los Piratas, un grupo de Vigo que obtivo éxito público e crítico a finais dos noventa, e que logo desenvolveu unha encomiable carrera artística en solitario. O ciclo remata o día 25 cun encontro con Jorge Coira, guionista, director e montador de cine e televisión, de quen cabe salientar filmes propios, como O ano da carracha (2004) ou 18 comidas (2010) e a dirección de series como Terra de Miranda, Padre Casares, As leis de Celavella, El comisario, Piratas ou Pelotas. Na actualidade, está rodando a versión fílmica da obra de Chévere Eroski Paraiso.
Todas as sesións do ciclo PULSO terán lugar ás 21:00. Para facilitar o diálogo de cada autor co seu público, organizaranse sesións íntimas para un máximo de cen persoas. Pódense adquirir billetes individuais de 5 euros para acceder a cada sesión ou o abono de 12 euros para as tres datas.
