Actualidade

Uns María Casares moi repartidos

PUBLICIDADE

Os XXIII Premios de Teatro María Casares xa teñen gañadoras. Un total de 12 espectáculos aspiraban a facerse con algún dos catorce galardóns nos que se dividen os María Casares, organizados pola Asociación de Actores e Actrices de Galicia coa colaboración da Consellería de Cultura e Turismo, a través da Axencia Galega das Industrias Culturais (Agadic), o Concello da Coruña, a Deputación da Coruña, a Fundación AISGE, A Fundación SGAE, o Padroado de Cultura do Concello de Narón e Gadis.

En total, nunha noite moi repartida, sete espectáculos gañaron algún premio. Commedia, de Contraproducións, conseguiu tres galardóns: espectáculo, actor secundario (Marcos Orsi) e vestiario (Suso Montero). Pola súa banda, Invisibles, de Redrum Teatro, levou outros tres premios: dirección (Marián Bañobre), iluminación (Laura Iturralde) e adaptación-tradución (Santiago Coregoso e Marián Bañobre).

O servidor de dous amos, de Talía Teatro, acadou outros dous galardóns: Maquillaxe (Martina Cambeiro) e actriz secundaria (Marta Lado). Casa O Rei, de Ibuprofeno, acadou outros dous galardóns: actor protagonista (Miguel Borines) e música orixinal (Caxade) e Anatomía dunha serea, de Iria Pinheiro, faise con outros dous: actriz protagonista (Iria Pinheiro) e mellor texto orixinal (Iria Pinheiro e María Lado).

Finalmente, Divinas Palabras Revolution, do Centro Dramático Galego, leva un premio María Casares: escenografía (Suso Montero). Patapatúm, de Elefante Elegante, tamén se fai cun premio María Casares: mellor espectáculo infantil.

En resumo, os gañadores divididos por espectáculos son:

1. Commedia (3 premios): espectáculo, actor secundario e vestiario
2. Invisibles (3 premios): dirección, adaptación-tradución e iluminación
3. O servidor de dous amos (2 premios): actriz secundaria e maquillaxe
4. Casa O Rei (2 premios): música orixinal e actor protagonista
5. Anatomía dunha serea (2 premios): actriz protagonista e texto orixinal
6. Divinas Palabras Revolution (1 premio): escenografía
7. Patapatúm (1 premio): mellor espectáculo infantil.

 

En resumo, gañadores divididos por categorías:

MAQUILLAXE: Martina Cambeiro por O servidor de dous amos (Talía Teatro)
VESTIARIO: Suso Montero por Commedia (Contraproducións)
ILUMINACIÓN: Laura Iturralde por Invisibles (Redrum Teatro)
ESCENOGRAFÍA: Suso Montero por Divinas Palabras Revolution (Centro Dramático Galego)
MÚSICA ORIXINAL: Caxade por Casa O’Rei, (Ibuprofeno Teatro)
ADAPTACIÓN-TRADUCIÓN: Marián Bañobre e Santiago Cortegoso por Invisibles (Redrum Teatro)
TEXTO ORIXINAL: Iria Pinheiro e María Lado por Anatomía dunha serea
ACTOR PROTAGONISTA: Miguel Borines por Casa O’Rei (Ibuprofeno Teatro)
ACTRIZ PROTAGONISTA: Iria Pinheiro por Anatomía dunha serea
ACTRIZ SECUNDARIA: Marta Lado por O servidor de dous amos (Talía Teatro)
ACTOR SECUNDARIO: Marcos Orsi por Commedia (Contraproducións)
DIRECCIÓN: Marián Bañobre por Invisibles (Redrum Teatro)
ESPECTÁCULO: Commedia, de Contraproducións.
ESPECTÁCULO INFANTIL: Patapatúm, de Elefante Elegante.

 

A GALA

Os directores Juanillo Esteban e Carlos Sante dirixiron unha gala que trasladou o público congregado no Rosalía Castro da Coruña á época do Imperio Romano, ofrecendo un espectáculo no que se mesturou o teatro coas técnicas do novo circo. Así, intercaláronse números de portes, clown, teas aéreas, corda lisa, teatro xestual ou parodia cómica. O elenco estivo conformado por Pablo Sánchez, Vanessa Rivas, Eduardo Rodríguez Cunha Tatán, Miguel Borines, Raquel Veganzones, Sue Moreno, Josito Porto, Natalia Outeiro Pajarito, Marta Iglesias, Akira Valero e Álvaro Reboredo Fiti. Ademais, Suso Montero encargouse un ano máis da escenografía da gala.

Durante a mesma, o actor e dramaturgo Carlos Santiago leu o Manifesto Galego do Día Mundial do Teatro e as Aulas de Teatro Universitario de Santiago e Ourense recibiron o Premio de Honra Marisa Soto. Entre as máis de 550 persoas que acudiron á gala, atopábanse autoridades como o alcalde da Coruña, Xulio Ferreiro; o director da Agadic, Jacobo Sutil; o concelleiro de Culturas da Coruña, José Manuel Sande, ou o reitor da Universidade de Santiago, Antonio López. Ademais, entre os convidados deste ano, estiveron presentes tamén a actriz Marisa Paredes e Chema Prado, antigo director da Filmoteca Nacional.

 

DISCURSO DE MABEL RIVERA

A gala, que non foi retransmitida pola TVG por decisión tomada pola organización ante a negativa do ente público de negociar unha mellora na retransmisión, contou co discurso de Mabel Rivera, vicepresidenta da AAAG. Rivera centrou parte da súa intervención en explicar o proceso seguido para tomar esta decisión. “Non conseguimos nunca que a gala se emitise nun horario razoable e pola primeira canle. Intentouse ano tras ano, pero este último non tivemos sequera a opción de expoñer directamente -e de negociar- as nosas peticións diante de alguén, sermos recibidas por alguén. E até aquí chegamos”, explicou Mabel Rivera antes de engadir que “nós somos os rostros, as voces, o talento nunha palabra, do audiovisual deste país. Moito antes de existir a canle autonómica, moitas de nós xa estabamos traballando nesta que é unha das manifestacións culturais máis sobranceiras do país, comprometida e pioneira, en certo modo no uso da lingua no directo co público dende a nosa profesión”.

Rivera, ademais, sinalou que “cando a televisión pública iniciou a súa actividade encontrounos preparadas para contribuír á normalización da lingua e da cultura do noso País dende a nosa profesión”. “Pensamos que a resposta por parte da canle pública non estivo nunca á altura desta contribución, e non só no tocante ao teatro senón a todo o panorama cultural de Galicia na súa diversidade, na súa calidade, na súa creatividade, na súa profesionalidade, nas diferentes manifestacións que enriquecen a vida cultural, a intelixencia e o espírito crítico da xente do País, e que a canle pública ten a obriga de ofrecer en toda a súa amplitude. Pois ata aquí”, concluíu Mabel Rivera.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos