Actualidade

As Residencias Paraíso 2020 escollen os seis proxectos artísticos da súa cuarta edición

PUBLICIDADE

As Residencias Paraíso 200 fan pública a selección dos seis procesos artísticos que o colectivo RPM acompañará en 2020. Despois de valorar 62 proxectos presentados, Shelter, Manodura, Teorema, H/Ostia, Carne de canción e O raro é que bailar sexa raro son os títulos dos proxectos que se desenvolverán en residencias de entre dúas e tres semanas ao longo do ano en diferentes espazos da xeografía galega.

 

A comisión de selección desta cuarta edición das Residencias Paraíso estivo formada por Félix Fernández e Alexis Fernández –por Colectivo RPM– e Davide González, Marta Alonso e Natalia Balseiro, como profesionais convidadas. A organización destaca que a selección ofrece “seis proxectos enormemente pertinentes – pola súa capacidade de traducir dende o sensible o común- e tremendamente reveladores da inmensa potencia da comunidade artística vinculada ás artes vivas no noso territorio”.

Dentro do grupo de artistas Paraíso 2020, o programa acompañará o proceso de investigación Shelter do colectivo Ex Architectures. Trátase dunha investigación de corte experimental entre o teatro físico, a arquitectura e a performance, que pon en crise a idea de desarraigamento dende a perspectiva de catro artistas da xeración millennial europea. A súa residencia desenvolverase en Normal, o espazo de intervención cultural da Universidade da Coruña.

O Teatro Rosalía de Castro e o Pazo da Cultura de Carballo suman forzas como espazos anfitrións do proceso de creación Manodura da artista galega Cris Vilariño. Acompañada da colaboración do dramaturgo andaluz Alberto Cortés, o seu proceso de creación xira arredor da adolescencia e da familia, un tema ao que esta creadora leva poñendo atención de xeito reiterado na súa traxectoria.

Nunha aposta polo acompañamento en continuidade, o Colectivo RPM estará ao carón do proceso de investigación de Teorema: unha proposta a cabalo entre a danza e a creación sonora, da man do creador Javier Martín en residencia no Pazo da Cultura de Narón.

O Salón Teatro de Santiago acollerá a proposta O raro é que bailar sexa raro, o sexto solo de Andrea Quintana. Para el, a creadora traza, a partir do propio, un discurso cuestionador sobre o xénero e a disidencia, coa danza como práctica de resistencia.

De igual modo, o Vello Cárcere de Lugo acollerá o proceso de investigación H/Ostia de Laura Villaverde, Raquel Espada e Megan Hanley. Xuntas abordan, dende o performativo, a emoción dos sucesos que se converten en puntos de inflexión nas nosas vidas, transformando a nosa realidade e sacándonos da nosa zona de confort.

Por último, na liña de apertura á comunidade de artistas estatais, esta edición acompañará o traballo de Laila Tafur co proxecto Carne de canción, que estará en residencia na Igrexa da Madalena grazas ao diálogo coa MIT de Ribadavia. A súa investigación, entre o corpo e a composición musical, atopa no achegamento á cultura pop o espazo dende o que afondar no pensamento crítico e feminista.

Os proxectos da cuarta edición das Residencias Paraíso desenvolveranse en residencias de entre dúas e tres semanas ao longo do ano e recibirán un apoio de 1.500 e 3.000 euros ata o total de 15.000 euros cos que se apoia a convocatoria. A iniciativa, impulsada dende Colectivo RPM, conta co apoio da Xunta de Galicia, a través da Axencia Galega das Industrias Culturais (Agadic), Concello de Santiago, Concello da Coruña, MIT de Ribadavia, Concello de Lugo e a Vicerreitoría de Igualdade, Cultura e Deporte da UDC, así como coa colaboración fundamental dos distintos espazos cómplices.

 

Colectivo RPM

O Colectivo RPM naceu en 2017 do impulso dun grupo de artistas vinculadas á danza, ás artes vivas e a creación contemporánea en Galicia coa vontade de deseñar proxectos para o común en paralelo aos seus proxectos artísticos persoais.

As socias fundadoras e en activo son Caterina Varela, Rut Balbís, Félix Fernández e Alexis Fernández (Maca). Xuntas deseñan e coordinan as distintas liñas de acción tratando de defender un espazo de visibilidade para a comunidade da danza e das artes vivas en Galicia. Canda elas, as persoas que amosan o seu apoio como socias-amigas creando comunidade e dando pulo para continuar.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!