Actualidade

Profesionais da danza reclaman que se manteña o programa de coproducións do Centro Coreográfico Galego

PUBLICIDADE

Mostran a súa preocupación pola situación de incerteza na que continúa o Centro Coreográfico Galego e reclaman unha resposta da administración ante o esmorecemento dos programas de dinamización e promoción da danza e das artes do movemento..

 

A Plataforma de Afectados polo Centro Coreográfico Galego (PACCG), un colectivo que agrupa case 300 profesionais, da danza, vén de facer público un comunicado no que lles solicita á Axencia Galega das Industrias Culturais (AGADIC) e á Consellería de Cultura que en 2020 manteña e reforce orzamentariamente o Programa de coproducións de espectáculos de danza do CCG.

Segundo o colectivo, este programa “constituíu nos últimos anos o apoio e vínculo principal e case único do CCG coa creación coreográfica galega actual, destinando un orzamento de 50.392 € en 2019-2020 para a coprodución de tres espectáculos de danza e un orzamento de 51.244 euros en 2017-2018 para outros tres espectáculos”. Os profesionais cren que a existencia deste programa “supuxo un pulo para a creación coreográfica do que se beneficiaron algunhas das compañías e creadoras galegas contemporáneas, que puideron levar a cabo os seus proxectos en condicións de viabilidade económica e material, xerando emprego ao involucrar a outras creadoras e profesionais nos mesmos, e poñendo en circulación seis espectáculos de danza dos que hoxe podemos gozar”.

O pasado 12 de maio, a PACCG emitiu un comunicado denunciando importantes eivas no Plan de reactivación dos sectores cultural e turístico fronte ao Covid19, publicado pola Xunta de Galicia. Neste comunicado, a PACCG advertía da escasa atención prestada á danza e ás artes do movemento galegas nun Plan que presentaba “fallas importantes como a omisión de calquera mención ao Centro Coreográfico Galego, que non aparece nomeado no Plan, mentres si o está o Centro Dramático Galego e a súa sede o Salón Teatro, o que supón unha discriminación incomprensible”.

A PACCG quere trasladar de novo “a súa fonda preocupación” pola ausencia de noticias en relación ao CCG, tras ser remitido o dito comunicado á Consellería de Cultura e á AGADIC, sen que recibisen resposta. Segundo o colectivo, “asistimos a unha enorme incerteza a respecto dunha unidade de produción que debera ocupar un lugar central na política cultural de apoio e promoción da danza profesional en Galicia, e que no entanto leva anos esmorecendo perante a pasividade da administración responsable e o recorte orzamentario continuado”.

A situación de desmantelamento do CCG, din no comunicado, “acadou as súas peores cotas cando a finais do 2019 a Xunta aprobou un recorte do 66% do orzamento do centro (de 150.000 € no ano 2019 a 50.000 € no 2020), e logo de anunciar a AGADIC que non dotaría ao CCG dun posto de dirección”, deixando así o centro sen proxecto nin capacidade de activar o sector.

O comunicado da PACCG conta co apoio da Asociación de Actores e Actrices de Galicia (AAAG), da Academia Galega de Teatro, da Asociación de Produtores Técnicos de Espectáculos de Galicia (APTEGA), da asociación de compañías e empresas de danza Emprendodanza e de Escena Galega, a Asociación Galega de Empresas de Artes Escénicas.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!