Actualidade

O Congreso do teatro Galego clausurouse cunha homenaxe a Ernesto Chao, Gustavo Pernas e Celso Parada

Academia Galega de Teatro premios

PUBLICIDADE

Todas as sesións do Congreso estarán dispoñibles para a súa consulta, a partir do día 15 e durante un mes, na plataforma culturaenvivo.com, a través da se que retransmitiu toda a actividade durante estes días. | Foto: Martín Lagoa |

 

O I Congreso Internacional do Teatro Galego clausurouse o pasado sábado 10 destacando que os novos retos que esixen o século XXI e a sociedade postpandemia reclaman un cambio en profundidade do sistema teatral galego para mellorar e facer fronte ao futuro.

Rosario Álvarez, presidenta do Consello da Cultura e encargada de pronunciar o discurso de clausura, lembrou que no Congreso de 1988, celebrado en Ferrol, o teatro galego estaba aínda en proceso de desenvolverse e que sobre el pairaban moitas incógnitas. O que acaba de rematar, dixo, “é unha demostración da fortaleza do sistema teatral galego”. A presidenta do CCG destacou, así mesmo, a unidade demostrada no Congreso, grazas a unión de asociacións profesionais que o fixeron posible.

Álvarez destacou a importancia do Informe sobre as Artes Escénicas realizado polo Observatorio da Cultura e presentado na primeira xornada de traballo, destacando que puña “cifras á percepción subxectiva. Destacou o grao de satisfacción do público, que lle outorga ás obras un 9,1 de puntuación e subliñou que o traballo realizado polos asistentes ao Congreso foi só unha diagnose sobre a que construír o futuro, “un paso previo para mellorar o sistema”. “Confiamos na transformación do teatro”, rematou.

 

Premios da Academia Galega de Teatro

A clausura rematou coa entrega dos primeiros premios concedidos pola Academia Galega de Teatro. Así, Manuel Lourenzo, María Xosé Queizán e Luís Álvarez Pousa foron nomeados Académicos de Honra. De igual maneira, Ernesto Chao, Gustavo Pernas e Celso Parada serán lembrados na cerimonia de clausura, na que se lles entregará, a título póstumo, a Medalla da Academia Galega de Teatro.

As medallas de Parada, Pernas foron recollidas polas súas compañeiras, isabel Ávila e Ánxela G. Abalo, mentres que a de Ernesto Chao recolleuna Luma Gómez en nome de Rosa Álvarez, viuva do actor, quen non puido desprazarse ata Compostela.

O acto, desenvolvido na Cidade da Cultura, foi amenizado polo trío musical Mr.Cool.

Imma Antonio, que conduciu o acto, puxo fin ao Congreso animando a todos a debater e reflexionar sobre as propostas recibidas para mellorar o sistema das artes escénicas de Galicia.

 

O Congreso

O I Congreso Internacional de Teatro Galego analizou durante os últimos tres días cuestións relacionadas coa experiencia acumulada no teatro galego nos últimos corenta anos, sobre os retos que enfronta na actualidade e sobre modelos externos dos que se poidan extraer ensinanzas no futuro. Máis de setenta especialistas participaron en conferencias, mesas de debate, comunicacións persoais e debates plenarios para, por unha banda, analizar o presente dende unha perspectiva académica que contribúa a un mellor coñecemento do sistema teatral de Galicia e, pola outra, deseñar os principios teóricos que deben guiar a creación dun plan estratéxico e dunha lexislación que ampare a creación e distribución escénica para a vindeira década.

O primeiro día do Congreso, o Observatorio da Cultura Galega, dependente do Consello da Cultura, presentou un completo Informe sobre a situación das artes escénicas que analiza o sistema teatral desde unha perspectiva global –público, xestores e creadores– e que, ademais, ofreceu as primeiras cifras de como lle afectou a crise derivada da pandemia.
Presentacións de iniciativas editoriais, arquivos de documentación, plataformas virtuais e iniciativas de distribución completaron a extensa ollada que o Congreso deitou sobre as artes escénicas e que terá a súa continuación na publicación das conclusión que se editarán posteriormente.

Todas as sesións do Congreso estarán dispoñibles para a súa consulta, a partir do día 15 e durante un mes, na plataforma culturaenvivo.com, a través da se que retransmitiu toda a actividade durante estes días.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!