A produción do Teatro Arriaga de Bilbao Erresuma/Kingdom/Reino chega esta fin de semana a Galicia. O Teatro Rosalía de Castro da Coruña acolle dúas funcións, hoxe e mañá, ás 20.30 horas. Trátase dun espectáculo baseado nas principais traxedias de William Shakespeare, con versión, dirección e espazo escénico do director de escena e director artístico do Teatro Arriaga Calixto Bieito.
Esta montaxe teatral está protagonizada por José María Pou, Joseba Apaolaza, Lucía Astigarraga, Ylenia Baglietto, Ainhoa Etxebarria, Miren Gaztañaga, Iñaki Maruri, Koldo Olabarri, Lander Otaola, Eneko Sagardoy e Mitxel Santamarina; e preséntase como unha proposta teatral poderosa estética e visualmente, cuxo foco central son as grandes personaxes das traxedias de Shakespeare, coas súas fortalezas e debilidades.
Bieito optou por unha adaptación que sintetiza as traxedias de William Shakespeare e aposta por manter a esencia, o básico na obra do autor inglés: a súa linguaxe, a súa violencia e a súa poesía. A montaxe transmite unha poética contemporánea, dende unha formulación escénica actual, que mesmo se achega a ser una instalación, o que permite ás e aos intérpretes construír as súas personaxes dun xeito libre e intuitivo.
